|
26.05.2018 | 10:07
1317

Алматыда Еуропа киносының апталығы басталды

Дәстүрлі шарада Ұлыбритания, Мажарстан, Германия және Францияның кинокартиналары көрсетіледі. Апталық «Арман» киноорталығында өтеді. Фильмдер түпнұсқа тілде орысша субтитрмен көрсетіледі.

Дәстүрлі шара шымылдығын ұлыбританиялық режиссер Стивен Лавридждің «Матанги/Майя» атты деректі фильмі ашты. Кинокартинада Шри-Ланканың тумасы Матанги Арулпрагасамның өмірі туралы баяндалады. Танымал әнші туралы туынды ТМД аумағында тұңғыш рет көрсетіліп отыр.

«Кезекті Еуропа киносының апталығында бұрынғыдан қысқа форматты таңдадық. Апталықта еңбек жолын енді бастап жатқан жас режиссерлардың туындылары көрсетіледі. Олардың фильмдері осы уақытқа дейін киносыншылардың жоғары бағасын алған. Сондай-ақ талай халықаралық кинофестивальде жүлделерді иеленген»,-деді Британ кеңесі маркетинг және қоғаммен байланыс жөніндегі менеджері Елена СИМ.

Ұйымдастырушылар әр көрерменнің қалауына сай келетіндей түрлі жанрларды қамтитын бағдарлама құрдық - дейді. Апталық аясында неміс режиссерінің «Қатарлар арасында», «Күн сәулесін кіргіз» мелодрамасы және «Юпитердің жерсерігі» атты фильмдер көрсетіледі.

Жалпы, шара аясында кәрі құрлық мемлекеттерінің аса танымал 4 кинотуындысы көрсетіледі. Арнайы іріктелген картиналардың барлығы еуропалық болмыстан сыр шертіп, ондағы халықтың тыныс-тіршілігін баяндайды. Сондай-ақ құрлықтың тоғысқан түрлі мәдениетін жаңа қырынан танытатын апталық тұрғындардың көптен күтетін шарасына айналып үлгерген.

Еуропа киносының апталығы 27 мамырға дейін өтеді.  Еуропаның шынайы бейнесін жаңа қырынан танытатын тың картиналар «Арман» киноорталығында көрсетіледі. Жұртшылық назарына ұсынылатын барлық туындылар орыс тіліндегі субтитрлармен түпнұсқада берілетін болады.


Перизат Көмекбайқызы, Рашид Шүкірәлиев, «Алматы» телеарнасы


Подписывайтесь на наш Telegram
Узнавайте обо всем первыми. Если есть, что сообщить, пишите нам в WhatsApp
Новости партнеров
След. →
Прямой эфир