Астанада диванын «сатқан» әйел сотталды

«OLX» интернет-платформасында жалған мәліметтер мен фотосуреттерді көрсете отырып, жоқ жиһазды сату туралы «фейк» хабарландыруларды орналастырған. Шамамен 40 адамды алдаған әйел 3 жыл 6 айға сотталып кетті, деп хабарлайды Almaty.tv.

Астана қаласының прокуратурасы хабарлағандай, әйел жиһаз сатамын деп хабарландыру берген. Оның құрығына түскен 40 адам шамамен 2 млн теңгелерінен айырылған.

«Мысалы, бірде ол  50 мың теңгеге диван сатамын деп жарнама берген. Оған қызыққан адам диванды көрместен, алаяқ әйелдің балансына 40 мың теңге жіберген. Ақшаны алғаннан кейін әйел байланысқа шықпай қойған», - деп хабарлайды Астана прокуратурасы.

Сотталушы кінәсін толық мойындап, барлық жәбірленушілерге келтірілген залалды өтеді. Сот үкімімен кінәлі жас баланың болуына байланысты жазасын кейінге қалдыра отырып, 3 жыл 6 айға бас бостандығынан айыру жазасына сотталды.

Үкім заңды күшіне енді.

Оқи отырыңыз: Заңсыз тексеріс: маңғыстаулық кәсіпкердің шығыны өндіріледі