Алматыда коммуналдық қызметтер жұмысы күшейтілген режимге ауысты

«Қазгидромет» РМК мәліметінше, 17-інен 18 мамырға қараған түні Алматыда ауыспалы бұлтты ауа райы күтіледі, жауын-шашынсыз. Ауа температурасы түнде +23…+25°С шамасында болады, деп хабарлайды Аlmaty.tv.

Алматы қаласы Коммуналдық инфрақұрылымды дамыту басқармасынан хабарлағандай,

18 мамырда сағат 13:00-ден бастап тәулік соңына дейін найзағаймен және бұршақпен бірге қатты нөсер жаңбыр жауады деп болжанып отыр. Жауын-шашын мөлшері 20 мм-ге дейін жетуі мүмкін. Жел батыстан, солтүстік-батыстан 3–8 м/с, найзағай кезінде екпіні 18–23 м/с дейін жетеді.

19 мамырда да ауыспалы бұлтты ауа райы сақталады. Түнде сағат 05:00-ге дейін жаңбыр жаууы мүмкін, күндіз жауын-шашынсыз. Ауа температурасы түнде +13…+15°С, күндіз +20…+22°С. Жел оңтүстік-батыстан 3–8 м/с.

«Қаланың коммуналдық қызметтері күшейтілген режимге ауыстырылды. Түнгі уақытта 366 арнайы техника бірлігі мен 355 жол жұмысшысы жұмылдырылған. Ал 18 мамырда күндізгі кезеңде ықтимал су басулардың алдын алу және жою мақсатында 515 техника бірлігі, 27 мотопомпа және 755 жұмысшы қала көшелеріне шығады», - делінген басқарма хабарламасында.

Сонымен қатар, мотопомпалармен және күрек-сыналармен жабдықталған 42 жедел бригада дайындық режимінде жұмыс істейді.

Арық желілері мен жауын суын қабылдайтын тұзақтарды тазалау және бақылау жұмыстарына ерекше көңіл бөлінуде. Қаладағы проблемалық учаскелерде тәулік бойы тазалау жұмыстары жүргізілуде.

Алматы қаласы құтқару қызметі (ШЖҚ «Алматы қаласының құтқару қызметі» МКК) тарапынан 15 техника бірлігі мен 50 қызметкер, ал ТЖД тарапынан 55 техника бірлігі мен 245 маман кезекшілікке шықты.

Оқи отырыңыз: Алматыда 19-25 мамыр аралығында ауа райы қандай болады