Алматының Алмалы ауданында даму жоспарлары: екі медициналық нысан, оңалту орталығы және жаңа мектептер

Өңірлік коммуникациялар қызметінде өткен брифингте Алмалы ауданының әкімі Арман Шәмшин білім беру, денсаулық сақтау және спорт салаларының дамуы туралы баяндады, деп хабарлайды Almaty.tv.

Оның айтуынша, бүгінде ауданда 49 мектеп, 60 балабақша және 25 медициналық ұйым жұмыс істейді. Әлеуметтік инфрақұрылымды жаңарту мен кеңейту жұмыстары бірнеше бағыт бойынша жүргізілуде.

Білім беру саласында биыл бірқатар ірі жоба жүзеге асырылып жатыр.

Маусым айына дейін №16 мектепте 300 орындық қосымша ғимарат пайдалануға беріледі. Сондай-ақ №124 мектеп ғимаратына сейсмикалық күшейту жүргізіліп, күрделі жөндеу жұмыстары аяқталады.

№128 мектеп бойынша жобалық-сметалық құжаттама әзірленіп жатыр.

Мектепке дейінгі білім беру жүйесінде де жаңарту жұмыстары жоспарланған. Маусым айында №10 балабақшада күрделі жөндеу аяқталады, ал шілде айында Тастақ шағынауданында жаңа балабақша пайдалануға беріледі.

Сонымен қатар №13, №21, №43 балабақшалар мен Мәуленов көшесіндегі «Теремок» балабақшасына күрделі жөндеу жүргізу үшін жобалық құжаттама әзірленуде.

Денсаулық сақтау саласында жыл соңына дейін ауданда екі маңызды нысан пайда болады: жаңа перзентхана және бір ауысымда 500 адам қабылдайтын заманауи емхана (Әйтеке би мен Масанчи көшелерінің қиылысында орналасқан). Арман Шәмшиннің айтуынша, құрылыс жұмыстары бекітілген кестеге сәйкес жүргізіліп жатыр.

Спорт инфрақұрылымын дамытуға да ерекше назар аударылуда. Тастақ шағынауданында мүмкіндігі шектеулі жандарға арналған көпфункционалды спорт орталығының құрылысы жалғасуда. Қазіргі таңда нысанның дайындық деңгейі 40%, құрылысты қараша айында аяқтау жоспарланған.

Арман Шәмшин атап өткендей, барлық жоба аудан тұрғындары үшін әлеуметтік қызметтердің қолжетімділігі мен сапасын арттыруға бағытталған.

Оқи отырыңыз: Алматының Алмалы ауданында инженерлік желілерді жаңғырту басталады