Алматыдағы қасбеттерді жаңғырту: тарихи келбетті сақтап, қалалық ортаны жаңарту

Алматының Медеу ауданында тұрғын үйлердің қасбетін жаңғырту бағдарламасы жүзеге асырылып жатыр. Биыл 50 көпқабатты тұрғын үйдің қасбетін ретке келтіру жоспарланған, деп хабарлайды Аlmaty.tv.

Мамандар қазіргі таңда Назарбаев даңғылы мен Қажымұқан көшесі бойында орналасқан тұрғын үйлерде жүргізіліп жатқан жұмыстар туралы айтып берді.

Медеу ауданы әкімдігінің өкілі Дамир Данияровтың айтуынша, бағдарламаға қаланың орталық бөлігінің сәулеттік келбетін қалыптастыратын негізгі көшелер бойындағы үйлер енгізілген.

«Бағдарламаның басты мақсаты – қаланың біртұтас сәулеттік келбетін қалыптастыру. Қасбеттерді жөндеумен қатар, іргелес аумақтарды көркейту жұмыстары да жүргізілуде. Бұл қалалық ортаның сыртқы келбетін кешенді түрде жақсартуға мүмкіндік береді. Нысандардың бір бөлігі толық аяқталса, қалғандары соңғы кезеңдегі жұмыстарды атқаруда», – деді Дамир Данияров.

«Алматыбасжоспар» ғылыми-зерттеу институты жанындағы Q-Lab әлеуметтік жобалау бөлімінің басшысы Тимур Ақатжанов әрбір нысан үшін оның сәулеттік ерекшеліктері мен техникалық жағдайы ескеріліп, жеке шешімдер әзірленетінін атап өтті.

«Егер ғимараттың тарихи немесе мәдени маңызы болса, оның бастапқы келбетін сақтауға басымдық беріледі. Мұндай жағдайда сәндік элементтерді қалпына келтіре отырып, жөндеу-реставрациялық жұмыстар жүргізіледі. Ал заманауи тұрғын үйлердің қасбеттерін жаңартуда табиғи тас пен гранит сияқты ұзақ мерзімді материалдар пайдаланылады. Бұл ғимараттардың эстетикалық тартымдылығын арттыруға мүмкіндік береді», – деді Тимур Ақатжанов.

Бағдарлама аясында ғимараттардың сыртқы көрінісімен қатар, атқарылатын жұмыстардың сапасына да ерекше көңіл бөлінуде. Жөндеу басталғанға дейін мамандар әрбір нысанды зерттеп, қасбеттің, сәулеттік бөлшектердің және конструкциялық элементтердің жағдайын бағалайды. Осыдан кейін ғимараттың ерекшеліктері мен қалалық ортадағы орналасуын ескеретін жеке жобалық шешім әзірленеді.

Осындай тәсілдің жарқын үлгілерінің бірі – 1953 жылы салынған Теміржолшылар үйі. Мұнда тарихи сәулеттік элементтерді сақтауға бағытталған жөндеу-қалпына келтіру жұмыстары жүргізілуде. Бұл ғимараттың бірегей келбетін сақтап, пайдалану мерзімін ұзартуға мүмкіндік береді.

Мамандардың пікірінше, қасбеттерді жаңарту тұрғын үйлердің сыртқы келбетін жақсартып қана қоймай, тұрғындардың өмір сүру жайлылығын да арттырады. Жұмыс барысында сыртқы қабырғалардың ақаулары жойылып, зақымданған әрлеу элементтері қалпына келтіріліп, кіреберіс топтары ретке келтіріледі.

Бағдарламаны жүзеге асыру Алматының сәулеттік бірегейлігін сақтап, үйлесімді қалалық кеңістік қалыптастыруға мүмкіндік береді. Көркейтуге кешенді көзқарас қаланың тарихи сипатын сақтай отырып, оның заманауи әрі тартымды келбетін дамытуға ықпал етеді.

Оқи отырыңыз: Алматыдағы The Spirit of Tengri фестиваліне 50 мыңға жуық көрермен жиналды