Атырауда коронавирус жұқтырған екі жүкті әйел босанды

Атырауда коронавирус жұқтырған екі жүкті әйел босанды, деп хабарлайды Almaty.tv облыстық Денсаулық сақтау басқармасының баспасөз қызметіне сілтеме жасап.

Атыраудағы №2 облыстық ауруханасында коронавирус жұқтырған екі жүкті әйел босанды. Аталған аурухананың білікті хирургтары мен анестезиолог мамандары, Атырау облыстық перинаталдық орталықтың дәрігер-реаниматологтары, гинекологтары және акушер құрамы мен неонатологтар оларды аман-есен босандырып алды. Салмағы – 3,620 келі, бойы 53 см болып туған дені сау қыз баланы 29 жастағы әйел кесарь тілігі арқылы дүниеге әкелді.

Ал 24 жастағы әйел салмағы – 4,270 келі, бойы 56 см ұл баланы өздігінен босанды. Жаңа туған нәрестелерден COVID-19-ға талдау алынды, нәтежисі ертең шығады деп күтілуде.

«29 және 24 жастағы жүкті әйелдер инфекциялық стационарға жүктіліктің 38 аптасында коронавирус инфекциясының симптомсыз расталған жағдайымен қабылданған болатын. Босанған аналар жұқпалы аурулар бөлімшесінде хаттамаға сәйкес емін жалғастыратын болады. Нәрестелер аналарынан оқшауланып, арнайы әзірленген таза палатаға ауыстырылды. Жағдайлары қанағаттанарлық, дәрігерлердің бақылауында», - дейді №2 Атырау облыстық ауруханасы директорының орынбасары Надя Ерғалиева.

Айта кету қажет, босану уақыты жақындаған 29 және 24 жастағы жүкті әйелден коронавирусқа қатысты тест қорытындысы оң нәтиже бергендіктен, аталған аурухананың изоляторына жатқызылған болатын.