Алматыда өте қажет дәрі-дәрмектердің жартыжылдық қоры жасалады

Алматы әкімі Бақытжан Сағынтаев селекторлық кеңес барысында фарминдустрия өкілдерімен дәрі-дәрмек препараттарын және медициналық заттарды үзіліссіз жеткізу мәселелерін талқылады, деп хабарлайды Almaty.tv тілшісі ҚазАқпаратқа сілтеме жасап.

Кеңестегі басты мәселе дәрі-дәрмек нарығының тұрақтылығын қамтамасыз ету болды. Өндірістік компаниялардың, дәріханалар желісінің және салалық қауымдастықтың өкілдері препараттардың қоры және оларды уақытылы жеткізу жоспарлары туралы айтты.

Сонымен қатар, олар процедураларды рәсімдеу және жүктерді қабылдау туралы сөз етті. Қала әкімі тиісті қызметтерге медициналық препараттар мен заттардың еш кедергісіз өтуін қамтамасыз етуді тапсырды. Қажет болса салықтық және кедендік әкімгерлік, сонымен қатар, шетелдік тауар сертификаттарын алу жеделдетіледі.

Кеңесте дәрі-дәрмектің тұрақты қорын құру мәселесі талқыланды. Яғни, өте қажет дәрі-дәрмектердің жартыжылдық қоры жасалады. Егер дәрі тапшылығы орын алса, олар бірден қаланың дәріхана желісінен алынатын болады. Бақытжан Сағынтаев қазіргі кезде қала тұрғындарының денсаулығын сақтау бірінші кезектегі әрі басты міндет екенін атап өтті. Денсаулық сақтаудың қажеттілігіне тиісті қаржының барлығы бөлінетін болады. Қала әкімі нарыққа қатысушыларды дәрі-дәрмектің жеткізілуі туралы шұғыл ақпарат беруге және дер кезінде көмек алуға шақырды. Барлық мәселелер шұғыл шешіледі.