Ең жас аналар қай өңірде тұратыны белгілі болды

Қазақстандықтар орта есеппен 25 жасында тұңғыш рет балалы болады. Ranking басылымының сарапшылары осындай қорытындыға келді, деп хабарлайды Almaty.tv тілшісі sputnik.kz сайтына сілтеме жасап.

Ең жас аналар Түркістан облысында тұрады. Ал алматылықтар бұл мәселеде, керісінше, асығыстық танытпайды. 2021 жылы адам көп шоғырланған Түркістан облысында ең көп бала дүниеге келді - 65,1 мың адам. Көрсеткіш 6,2%-ке өскен. Үштікке Алматы облысы (55,2 мың, плюс 1,5%) және Алматы (37,9 мың сәби, плюс 6,7%) енген.

Бала туу көрсеткіші бойынша Солтүстік Қазақстан облысы тізім соңында тұр. Барлығы 6,5 мың сәби — бір жыл бұрынғыға қарағанда 5,7%-ке аз. Солтүстік Қазақстан облысынан басқа, Қостанай және Павлодар облыстарында көрсеткіштің азаюы байқалды. Ал ең көп өсім Шымкентте тіркелді. Бір жылда бірден 11,5%-ке, 35,4 мың адамға артты.

Елдегі барлық сәбидің жартысынан астамын 20-дан 29 жасқа дейінгі "жас" аналар босанған: 20-24 жас аралығында -- 98,2 мың сәби, 25 - 29 жас аралығында - 137 мың сәби. Ал 14,5 мың сәбиді (3,3%) 20 жасқа толмаған аналар дүниеге әкелді.

30-34 жастағы аналардың көрсеткіші - 116,6 мың бала (26,1). Әйелдер жасы ұлғайған сайын жаңа туған нәрестелер саны да төмендейді. Мысалы, 35-39 жастағы аналарда — 64,2 мың бала, 40-44 жастағы аналарда — 15,1 мың бала, 45-49 жастағы аналарда — 725 бала, 50-54 жастағы аналарда — 53 сәби, 55 жастан бастап - 6 сәби дүниеге келді.

446,5 мың нәрестенің 395,7 мыңы тіркелген некедегі отбасында туылды. 20 жасқа дейінгі тұрмыстағы әйелдерде - 10,8 мың бала, 20-24 жастағы әйелдерде — 89 мың, 25-29 жастағы әйелдерде — 125,5 мың нәресте.

2021 жылы босанған ананың орташа жасы - 29,5 жас, 2020 жылы - 29,3 жас болды. Қалалық жерлерде бала туған аналардың орташа жасы - 29,9, ауылдық жерлерде - 29,1 жас.

Ең жас аналар 2021 жылы Түркістан облысында тіркелді. Тұңғышын босанған әйелдердің орташа жасы - 22,5 жас. Екінші орында Шымкент қаласы (23,9 жас), үшінші орында Жамбыл облысы (24 жас) иеленді. Алматыда сәбилі болуға аса асықпайды. Тұңғышын босанған әйелдердің орташа жасы - 28,1 жас. Одан әрі Астана (27 жас) және Алматы облысы (25,5 жас).