Жоғарғы соттың екі судьясы қызметінен кетті

Қазақстан парламентінің сенаты президенттің Жоғарғы сот судьяларын қызметінен босату туралы ұсынымын қолдады, деп хабарлайды Almaty.tv тілшісі Sputnik Қазақстанға сілтеме жасап.

4 наурызда сенат депутаттарының қарауына Анатолий Смолинді және Серік Әбнәсіровті Жоғарғы сот судьясының қызметінен босату туралы мемлекет басшысының ұсынымы енгізілді.

Президент жарлығымен Смолин Қостанай облыстық сотының төрағасы қызметіне тағайындалды.

Ал Әбнәсіров зейнет жасына толуына байланысты отставкаға шығу туралы өтініш берген.

«Құрметті депутаттар, сіздерден Анатолий Смолинді басқа судьялық қызметке ауысуына, сондай-ақ Серік Әбнәсіровті отставкаға шығуына байланысты Жоғарғы сот судьясы қызметінен босату туралы мемлекет басшысының ұсынымын қолдауды сұраймыз», – деді Жоғарғы сот кеңесінің төрағасы Талғат Донақов.

Депутаттар президенттің ұсынымын бірауыздан қолдап дауыс берді.

Сенат спикері Мәулен Әшімбаев Жоғарғы соттың бұрынғы судьяларына атқарған қызметі үшін алғыс білдірді.