Әлеуметтік желіде өртеніп жатқан көліктердің видеосы тарады. ТЖМ мәліметінше, оқиға Маңғыстау облысында болған, деп хабарлайды Almaty.tv тілшісі Tengrinews.kz-ке сілтеме жасап.
Ведомство мәліметінше, жол апаты Ақтау – Мұнайлы тасжолында болған.
"8 қыркүйекте сағат 15:35-те 112 кезекшінің пультіне ЖКО туралы хабарлама келіп түсті. Тасжолда Mitsubishi Montero жеңіл автокөлігі мен Камаз бетпе-бет соқтығысқан. Жол апаты салдарынан екі көлік толығымен өртеніп кеткен. Маңғыстау облысы ТЖД қызметкерлері 16:19-да өртті сөндірді", - деп хабарлады министрлік.
Ведомство мәліметінше, өртсөндірушілер мен құтқарушылар келген кезде көліктер өртеніп жатқан.
"Mitsubishi көлігіндегі өртті сөндіргеннен кейін үш адамның күйген денесі табылды. Екінші көлікте қаза тапқандар немесе зардап шеккендер туралы әлі хабарланған жоқ. Оқиға орнына жеті адам және екі арнайы техника шықты", - деп толықтырды ТЖМ.
Оқи отырыңыз: Маңғыстауда 460 бала тамақтан уланды: Бір ай ішінде бүкіл мектептердің асханасы тексеріледі
