Шарын шатқалында қаза тапқан мұғалім Мерей Ибрагимов «Ерлігі үшін» медалімен наградталды

Президент Шарын шатқалындағы қайғылы оқиға кезінде қаза тапқан Мерей Ибрагимовтың жақындары мен туыстарына көңіл айтты, деп хабарлайды Almaty.tv.

Мемлекет басшысы 29 мамырда Алматы облысындағы Шарын шатқалында болған қайғылы оқиғаны үлкен күйзеліспен қабыл алды. Қасым-Жомарт Тоқаев қайтыс болғандардың жақын туыстарына көңіл айтып, жарақат алғандардың тезірек сауығып кетуіне тілектестік білдірді.

«Шәкірттерін құтқарамын деп өзі құрбан болған білікті маман Мерей Нұрғазыұлы өмірін ұстаздыққа арнады. Оқушыларының сүйікті мұғалімі болды. Табиғат тосын мінез көрсеткен апатты жағдайда жас ұстаз батылдық танытып, оқушысына жанкештілікпен көмек көрсетуге ұмтылды. 26 жасында өмірден қыршын кеткен Мерей Нұрғазыұлының ерлігі мен жарқын бейнесі ұмытылмайды», – делінген көңіл айту жеделхатында.

Мемлекет басшысының Жарлығымен адам өмірін сақтап қалуға байланысты қиын-қыстау жағдайда көрсеткен ержүректігі мен жанқиярлығы үшін марқұм Мерей Ибрагимов «Ерлігі үшін» медалімен наградталды.

Еске сала кетейік, Мерей Нұрғазыұлы Ибрагимов Алматы облысындағы Шарын шатқалында болған селден оқушыны құтқарамын деп қаза болды. Ол Алматы қаласы № 199 мамандандырылған гимназияның мұғалімі.