|
31.08.2022 | 18:26
25712

Нұр-Сұлтанда «Астана тазалық» қызметкерлері жұмысқа шыққан жоқ

Таңғы 08:00-де басталған наразылық сағат 12:00-ге дейін жалғасты

Нұр-Сұлтанда «Астана тазалық» қызметкерлері жұмысқа шыққан жоқ Almaty.tv

Нұр-Сұлтанда «Астана тазалық» компаниясының 300-ге жуық қызметкері наразылыққа шықты, деп хабарлайды Almaty.tv тілшісі.

Айлығымыз шайлығымызға әрең жетеді деген көше сыпырушылар жалақының аздығынан балаларын мектепке дайындай алмай отырған көрінеді. Айналдырған 109 мың теңге еңбекақының өзін қысқартып, ай соңында азық-түлікке ақша жетпей қалады екен.

Бүгін «Астана тазалық» қызметкерлері жұмысқа шыққан жоқ. 300-ге жуық көше тазалаушы айлықтың аздығын айтып наразылығын білдірді. Жалақы себепсіз азайып, істеген сағаты қиылып қалады екен. Жұмысшылар «жалақыны көтер» десе, басшылық «компания қарызға белшесінен батқан» дейтін көрінеді. Оның үстіне тырнақ астынан кір іздеп, 5 минут демалуға отыра қалса, фотоға түсіріп, айыппұл салатыны тағы бар.

«Біз түнгі сағат 03:ОО-де тұрамыз. Түстен кейінгі сағат 04:00-ге дейін далада жүреміз. Қанша сағат, өзіңіз есептеп көріңіз. Сондағы біздің алатын айлығымыз 109 мың теңге. Осыны айтсам, жұмысшылар айтқандай «менің соңыма түссе, түсіп алсын», мына директордың орынбасары «ақша жоқ» деп маған дауыс көтеріп сөйлейді», – деді «Астана тазалық» ЖШС қызметкері Нұғымар Құмар.

Бүгін наразылыққа шыққандардың дені – елуден асқан ел ағалары мен аналар. Көпшілігінің көздері қызарып кеткен. Олардың айтуынша, ұйқы мүлдем қанбайды. Соның кесірінен қан қысымы жиі көтерілетін болыпты.

«Медицина, полиция  қызметкерлері алады. Біз адам емеспіз бе? Біз де күндіз-түні жұмыс істейміз. Қан қысымы көтеріліп, 3-4 адам көз жұмды. Біз түнде ұйықтай алмаймыз. Қыстың күні ұйқы жоқ. 24- 25 сағат. Үйге барып, 3-4 сағат ұйықтаймыз дегенше, жұмысқа қайта келу керек болады», – деді   «Астана тазалық» ЖШС қызметкері Кенжебек Сағындықов.

Наразылыққа Нұр-Сұлтан қаласы әкімінің орынбасары Нұрлан Нұркенов арнайы келген. «Астана тазалықтың» қарызы барын мойындады. Аталған компанияның 840 миллион теңге берешегі бар екен. Енді әкімдік 2,5 миллиард теңге бөліп, бүгінгі мәселені шешуді көздейді. Ал жұмысшылардың жалақысы қараша айынан бастап көтерілетінін мәлімдеді.

«Бұл мекеме ақшаны аудан арқылы алады. Есіл, Сарыарқа, Байқоңыр, Алматы ауданы. Қазір жұмысты бастап кетеміз де, қазанда қабылдап, ақшаны кәсіпорынға бөлеміз. Сондықтан қарашадан бастап,  жоспар бойынша жалақыны көтерейік», – деді Нұр-Сұлтан қаласы әкімінің орынбасары Нұрлан Нұркенов.

Таңғы сегізде басталған наразылық күндізгі сағат 12:00-ге дейін жалғасты. Жалақымен қоса «Астана тазалық» қызметкерлері басшының орынбасарын ауыстыруды талап етті. Әкімдік өкілі бұл мәселені де қарастыратынын айтып тарқасты.

Өмір Серікбекұлы, Данияр Омар, «Алматы» телеарнасы, Нұр-Сұлтаннан



Біздің Telegram каналына жазылып, соңғы ақпаратты оқыңыз. Егер хабарлама жолдағыңыз келсе, WhatsApp мессенжеріне жазыңыз.
Новости партнеров
След. →
Прямой эфир