Ақтауда 4 келіден астам гашиш тәркіленді

Маңғыстау облысында еліміздің оңтүстік аймақтарынан каннабис тобына жататын есірткі заттарын тасымалдаумен айналысқан заңсыз арнаның жолы кесілді. ІІМ есірткі қылмысына қарсы іс-қимыл бөлінісінің қызметкерлері жүргізген жедел-іздестіру шаралары нәтижесінде бұл тасымал желісі толығымен жабылды, - деп хабарлайды Almaty.tv тілшісі ІІМ баспасөз қызметіне сілтеме жасап. 

Мамыр айының соңында Ақтау қаласында есірткінің заңсыз айналымына күдікті ретінде бір ер адам қолға түсті. Тәртіп сақшылары тінту барысында одан ішіне гашиш толтырылған төрт пакетті тәркілеген. Арнайы тағайындалған сараптама қорытындысы тәркіленген заттың жалпы салмағы 4 килограмнан асатын гашиш есірткісі екенін растады.

Ресми ақпарат және қабылданып жатқан шаралар:

Аталған заңбұзушылық дерегі бойынша ҚР Қылмыстық кодексінің 296-бабы 4-бөлігіне сәйкес сотқа дейінгі тергеу амалдары басталды.

Ұсталған күдікті азамат қазіргі уақытта уақытша ұстау изоляторына қамалды.

«Ведомство есірткінің заңсыз айналымына қатысты кез келген әрекетке қолданыстағы заңнама аясында ең қатаң шаралар қолданылатынын қаперге салады», — деп мәлімдеді ІІМ есірткі қылмысына қарсы іс-қимыл комитетінің басқарма бастығы Бақытжан Әмірханов.

Оқи отырыңыз: Атыраудағы атышулы қылмыс: кезекті сот отырысында айғақтар жарияланды