Қазақстан алтын қоры бойынша ТОП-20 елдің қатарына енді

Қазақстан алтын қоры бойынша әлемдегі жетекші 20 елдің қатарына енді. Бұл туралы өнеркәсіп және құрылыс вице-министрі Иран Шархан Астанада өткен Халықаралық тау-кен металлургия конгресінде мәлімдеді, деп хабарлайды Almaty.tv тілшісі Azattyq Rýhy агенттігіне сілтеме жасап.

Оның айтуынша соңғы 10 жылда елімізде алтын кенін өндіру көлемі 2,2 есеге артты.

«Сәйкесінше тазартылған алтын өндірісі екі есеге өсті. Осылайша Қазақстан алтын қоры бойынша әлемдегі 20 жетекші елдің қатарына кірді», - деді Иран Шархан.

Вице-министрдің айтуынша, бұл 420 миллиард теңге инвестиция тартуға мүмкіндік берді.

Ол 2026 жылға қарай барлау алаңын 1,9 миллион шаршы шақырымнан 2,2 миллион шаршы шақырымға дейін ұлғайту жоспарланып отырғанын жеткізді.

Дүниежүзілік алтын кеңесінің мәліметі бойынша 2025 жылы алтын қоры бойынша ТОП-3 ел:

• АҚШ (8,13 мың тонна),

• Германия (3,35 мың тонна),

• Италия (2,45 мың тонна).

Оқи отырыңыз: Алматы әкімі шаһардағы туризмді дамытуға қатысты қорытынды есеп пен жоспарды тыңдады