Наурызнама: Алматы театрлары «Қара жорға» ырғағымен тоғысты

Бүгін Наурызнама онкүндігінің үшінші күні — Мәдениет және ұлттық салт-дәстүр күнінде Алматыны би думан кернеді. Мегаполистің жетекші театрларының артистері қала тұрғындарын көктемгі жаңару мерекесімен құттықтау үшін ауқымды флешмобқа бірікті, деп хабарлайды Almaty.tv.

Бұл ауқымды перформанстың бастамашысы — ҚР Мәдениет және ақпарат министрлігі мен Алматы қаласы әкімдігінің ресми қолдауымен Наталия Сац атындағы театр болды.

Айта кетейік, қазіргі уақытта қала әкімдігі аталған театр ғимаратына ауқымды реконструкция жүргізуде. Бұл туралы жақында Almaty TV телеарнасындағы «Архитектор» бағдарламасының шығарылымдарының бірінде егжей-тегжейлі айтылған болатын.

Жарқын флешмобқа сонымен қатар мына театрлар атсалысты:

• Ғ. Мүсірепов атындағы Қазақ мемлекеттік академиялық балалар мен жасөспірімдер театры;
• М. Лермонтов атындағы мемлекеттік академиялық орыс драма театры;
• Қ. Қожамияров атындағы республикалық мемлекеттік академиялық ұйғыр музыкалық комедия театры;
• Республикалық мемлекеттік академиялық корей музыкалық комедия театры;
• Республикалық академиялық неміс драма театры.

Түрлі шығармашылық мектептер, әртүрлі этностар мен стильдер болғанымен, ырғақ — ортақ, рух — бір. Бұл би шекараларды жойып, бүкіл қаланы біртұтас мерекелік сахнаға айналдырды. Ол достықтың, ата-баба мұрасына деген құрметтің және Алматы мәдени кеңістігінің ажырамас бірлігінің жарқын символына айналды.

Ерекше атап өтерлігі, флешмобқа кәсіби бишілер емес, дәл осы драма актерлері қатысты. Олар небәрі бір аптаның ішінде дала биінің ырғағын шебер меңгеріп, әрбір қимылға актерлік харизма мен дәстүрге деген сүйіспеншілігін сыйғыза білді.

ҚР «Салтанат» мемлекеттік би ансамблі бірегей хореография дайындап, флешмобтың кәсіби деңгейде өтуіне атсалысты.

Жобаны іске асыруда Almaty TV телерадиокешені ерекше рөл атқарды. Almaty TV командасы жай ғана хабар таратушы емес, басты ақпараттық серіктес әрі идеялық ниеттес ретінде түсірілім жұмыстары мен медиа қолдауды қамтамасыз етті. Соның арқасында миллиондаған көрермен мерекелік энергияны экран арқылы сезінуге мүмкіндік алды.

Келе жатқан Әз-Наурыз мейрамы құтты болсын! Көктем әр шаңыраққа жылулық, береке мен шабыт әкелсін!