Оралда синтетикалық есірткі таратқан күдікті ұсталды

Оралда синтетикалық есірткі таратқан 19 жастағы жігіт ұсталды, деп хабарлайды Almaty.tv тілшісі Polisia.kz-ке сілтеме жасап.

Есірткі қылмысына қарсы іс-қимыл басқармасының қызметкерлері күдіктіні тінту кезінде 22 зип-пакетке оралған ақ ұнтақ тәрізді затты тапқан. Пакеттер фольгаға оралған. Сондай-ақ полицейлер жақын маңдағы аумақты тексеру барысында үш түрлі жасырын орыннан тағы 3 пакет тапты.

Сот-химиялық сараптама қорытындысы бойынша тәркіленген зат синтетикалық есірткі санатына жататын альфа-PVP екені анықталды. Жалпы салмағы — 14,97 грамм.

Аталған факті бойынша қылмыстық іс қозғалды. Қазір тергеу жүріп жатыр. Оның барысында тыйым салынған заттың жеткізілу арналары мен өзге де қатысы бар тұлғалар анықталады. 

Оқи отырыңыз: Алматыда «қасбеттен қасбетке дейін» қағидаты бойынша көше тазалаудың жаңа форматы енгізіледі