Тең мүмкіндіктер алаңы: Алматыда ерекше балалар мен ата-аналар бақ сынауда

Алматыда инклюзивті қоғам құндылықтарын дәріптеу мақсатында ерекше білім беруді қажет ететін 3–4 сынып оқушылары, олардың ата-аналары мен педагогтері арасында қалалық «Бірлік пен мүмкіндік» спорттық-интеллектуалдық байқауы басталды, деп хабарлайды Аlmaty.tv

Оқу-ағарту министрлігінің «Адал азамат» біртұтас тәрбие бағдарламасы аясында ұйымдастырылған бұл іс-шараға барлық ауданнан келген командалар қатысып, спорттық эстафеталар, логикалық тапсырмалар мен танымдық ойындарда бақ сынап жатыр. Басты мақсаты – ерекше қажеттілігі бар балалардың әлеуметтік бейімделуіне ықпал етіп, отбасы мен мектеп арасындағы серіктестікті нығайту, сондай-ақ қоғам назарын инклюзивті білім берудің маңыздылығына аудару. Сайыс қорытындысы бойынша үздік шыққан ұжымдар арнайы кубоктармен, дипломдармен және бағалы сыйлықтармен марапатталды.

«Сегіз ауданнан 3,4 сынып оқушыларының ішінен инклюзивті балалар, соның ата-аналары және ұстаздары спорттық, интеллектуалдық сайыстарға қатысады», – деді № 187 жалпы білім беретін мектептің директоры Риза Мырзаханова.

«Іс-шарамыз балалардың көңіл-күйін көтеру, жазғы демалыста қауіпсіз және өздерін басқа ортамен достасу, жазғы демалыс кезеңінде оқушыларымыздың интеллектуалдық, жаңағы өнерге деген қызығушылығын арттыру мақсатында іс-шараларды ұйымдастырып жатырмыз», – деді Білім берудегі жаңа технологиялардың ғылыми-әдістемелік орталығының әдіскері Рита Жүсіпова.

Оқи отырыңыз: Алматыда есірткі жарнамасына қарсы ауқымды акция өтті