|
Saıasat
17.10.2019 | 18:25

Алматыда мерейтойлық күндерді мерекелеуге дайындық мәселесі талқыланды

2020 жылы Абай Құнанбаевтың 175 жылдығы, Әбу Насыр әл-Фарабидің 1150 жылдығы тойланады

Алматыда мерейтойлық күндерді мерекелеуге дайындық мәселесі талқыланды

Алматы әкімінің орынбасары Ержан Бабақұмаровтың төрағалық етуімен келер жылы Абайдың 175 жылдығына, Әбу Насыр әл-Фарабидің 1150 жылдығына және Алтын Орданың 7 жылдығына арналған шараларды дайындау және өткізу бойынша кеңес өтті. Кеңеске ғалым-тарихшылар мен философтар, өнер, кино, театр қайраткерлері, мәдениет саласының өкілдері, ведомстволық бағынышты ұйымдардың басшылары қатысты. деп хабарлайды Almaty.tv тілшісі.

2020 жылы ел ауқымында Абай Құнанбаевтың 175 жылдығы, Әбу Насыр әл-Фарабидің 1150 жылдығы аталады, сонымен қатар Алтын Орданың 750 жылдығын мерекелеу бойынша бірқатар шаралар өтеді.

Айта кетерлігі, бұл мерейтойлық шаралардың барлығы ЮНЕСКО-ның қолдауымен халықаралық деңгейде ұлықталатын болады.

«Алматы еліміздің мәдени орталығы ретінде жалпы республикалық шараларды өткізудің негізгі ошағы болуы тиіс», - деді Е. Бабақұмаров.

Халықаралық конференциялар, көрмелер мен «дөңгелек үстелдер» өткізу бойынша осынау мерейтойлық күндерді мерекелеудің жалпы қалалық шаралары жоспарларының жобалары әзірленді.

Жиын барысында әр жоспар бойынша ұсыныстар мен толықтырулар енгізілді.

«Белгіленген тарихи күндерді мерекелеу – халықтың тарихи сана-сезімін тереңдетуге және жаһандық форматта еліміздің рухани мәдениетін жан-жақты алға жылжытуға бағытталған тәуелсіз Қазақстанның жаңаша тарихындағы маңызды оқиғалар», - деп атап өтті Алматы әкімінің орынбасары.

Кеңестің қорытындысы бойынша Мәдениет басқармасына барлық ұсыныстарды қарап шығу және мерейтойлық күндерді мерекелеу жөніндегі түпкі жоспарға енгізу тапсырылды.