Алматы «Алматы жазы» науқаны аясында қоқыс алаңдарын тазалау, жуу және зарарсыздандыру жұмыстары жалғасуда, деп хабарлайды Almaty.tv.
Алматыда күн сайын 1300 тоннадан астам қатты тұрмыстық қалдық шығарылады.
Алматы қаласының экологиялық менеджмент және қоршаған ортаны басқару департаментінің бас маманы Әлинұр Бәкенов атап өткендей, қалада бекітілген кестеге сәйкес жуумен және зарарсыздандырумен 171 бірлік арнайы техника айналысады.
«Алматы қаласында қоқыс шығаратын ұйымдар жеке сектордағы қатты тұрмыстық қалдықтарды ҚТҚ шығарудың бекітілген кестесіне сәйкес, аптасына бір рет шығарады. Көпқабатты үйлердегі қоқыс контейнерлері күн сайын, ал проблемалық аумақтарда күніне екі, кей жерде үш рет шығарылады», – деді Әлинұр Бәкенов.
Зарарсыздандыру және жуумен қоса, жұмысшылар сынған контейнерлерді жөндеп, қоқыс алаңдарын ретке келтіреді.
«Алматы жазы» науқаны басталғалы қоқыс шығару ұйымдары 300 контейнер мен 60 контейнерлік орынды жуу, зарарсыздандыру және декатизациялау жұмыстарын жүргізді. Сондай-ақ, 150 контейнер жөнделіп, боялды.
Қазір қала аумағында ҚТҚ жинау мен шығару жұмыстары толықтай жолға қойылған. Қалдық шығару қызметін 21 қоқыс шығару ұйымы ұсынады.
«Алматы жазы» іс-шарасы аясында 1 454 контейнерлік алаң санитарлық өңдеуден өтеді, 700 контейнер жуылып, зарарсыздандырылады, сондай-ақ 24 747 көше мен ауладағы қоқыс жәшіктерін тазалау көзделген.
Естеріңізге сала кетейік, «Алматы жазы» акциясы «Таза Казакстан» жалпы республикалық науқанын іске асыру аясында басталды және осы жылдың 6 шілдесіне дейін созылатын «Алматы – біздің ортақ үйіміз» науқанының жалғасы болып табылады.
Оқи отырыңыз: Елімізде бидайдың элиталық сорты тапшы
