Министр қазақтан сәби сүйген африкалық әйелге көмектесуге уәде етті

Моника Камукенж Камганза Қазақстанға былтыр күнкөріс қамымен келген.

Ішкі істер министрі Қалмұханбет Қасымов визасының мерзімі өтіп кеткен Конго азаматы Моника Камукенж Камганза мен үш айлық қызына көмектесуге уәде етті, деп хабарлайды Sputnik Қазақстан.

«Оның мәселесін елшілікпен бірлесіп шешеміз», - деп қысқа жауап берді Қасымов.

Моника Камукенж Камганза бір жылдан бері Астанада тұрады. Конго азаматы ЭКСПО көрмесі кезінде күнкөріс қамымен келіп, ақыр соңында қалып қойған. 27 жастағы африкалық әйел осыдан үш ай бұрын дүниеге сәби әкелді. Айтуынша, қыздың әкесі қазақстандық. Sputnik Қазақстан тілшісіне берген сұхбатында Моника Қазақстаннан ешқайда кеткісі келмейтінін айтқан еді.