Ұзақ жыл ауруханада істеген мейіргер 100 науқасты өлтіргенін мойындады

Германияда бұрынғы мейіргер жүз науқасты өлтіргенін мойындады, деп хабарлайды The Guardian. 

Ол сот отырысында қылмысын мойындады. Тағылған айыптаулар рас па деген сұраққа Нильс Хегель «иә» деп жауап берді.

«Айтқанымның бәрі шын», — дейді ол.

Судья Себастьян Бюерман айтқандай, отырыстың басты мақсаты — қылмыскердің қанша адамды өлтіргенін анықтау.

«Шындықты білу үшін қолымыздан келгеннің бәрін жасаймыз», — деді ол.

Айыптауға сүйенсек, 2000-2005 жылдары ер адам Ольденбург қаласының ауруханасында 36 науқасты өлтіріпті, ал көрші Дельменхорстте – 64. Барлығы 130 адамның мәйіті қазылып, тексерілді. Тергеу материалдары бойынша, ол жансақтау бөліміндегі науқастарға адам өміріне қауіпті дозада екпе салып, «басшылығына адамдарды қалай тірілтуге болатынын және зерікпеудің амалын көрсеткісі келген».

Алғаш рет мейіргер 2008 жылы қастандық жасағаны үшін сотталыпты. Ол кезде жеті жылға бас бостандығынан айырылған. Ал 2015 жылы бес және одан да көп тұлғаны өлтіргені үшін 15 жылға сотталды. Хегель психиатрға 30 кісіні өлтіргенін айтқан кезде, тергеу жалғасын тапқан.

Жалпы, құрбандардың саны екі жүзге жететін көрінеді, алайда мұны нақтылау мүмкін емес, өйткені мәйіттердің көпшілігі кремацияланған.