Қызылжарда аққуларды атқан Астана тұрғыны ұсталды

Солтүстік Қазақстан облысының Мамлют қаласында тұратын досының үйіне қонаққа келген Астана тұрғыны аққуларға заңсыз аңшылық жасаған. Аталған фактіге қатысты қылмыстық іс қозғалды, деп хабарлайды Baq.kz.

Мамлют қаласындағы қоғамдық тәртіпті қадағалау мақсатында көшелерді аралап жүрген полиция инспекторы Александр Рогачев елді мекеннің сыртында атылған мылтық дыбысын естиді. Тәртіп сақшысы бірден аудандық Ішкі істер бөлімінің кезекші бөліміне хабарласып, ауданның шыға берістегі жолына патрульдік полицейлерді жіберген.

Мылтық атылған жерге жедел жеткен полиция инспекторы күдік тудырған Nissan автокөлігін тоқтатқан. Тінту барысында көліктің ішінен аңшы мылтығы табылған.

«Текере келе, күдіктінің Астана қаласының тұрғыны екені анықталды. 1987 жылы туған. Ол Мамлют қаласында тұратын досына қонаққа келген. ҚР Қылмыстық Кодексінің 337-бабының 1-бөлігі «Заңсыз аңшылық» фактісі бойынша сотқа дейінгі тергеу амалдары жүргізіліп жатыр», – дейді Мамлют аудандық Ішкі істер бөлімінің бастығы, полиция майоры Серік Әлжанов.

«Мен аңшылыққа құмармын. Көлде жүзіп жүрген құстарды көріп, қызығып кеттім. Өзімді ұстай алмай қалдым», – деп ақталмақ болды күдікті.

Көліктен 3 сұңқылдақ аққу табылған. Қасиетті құстың киесінен қорықпаған аңшы заң алдында жауап береді.