Анасының шашынан көйлек тіктіріп жатыр

Әйел 2014 жылы анасының қауіпті ауруға шалдыққанын білгелі бері оның шашын жинап келгенін айтты. Кез келген қалыңдық той күні өзінің ерекше жан екенін сезініп, жанында туысқандары мен жақын достарының болғанын қалайды. Алайда отбасы мүшелерінің біреуі қайтыс болса ше?

Марқұм осы ерекше күннің бір бөлігіне айналу үшін не істеуге болады? Кейбір адамдар марқұм жақсы көрген әнді орындайды, тілек айтқан кезде есімін ауызға алады немесе бір кездері оған тиесілі болған киімді киеді. Бірақ бұл әйел бұдан да тереңірек барған екен, деп хабарлайды Mirror.

Қалыңдық марқұм анасының шашынан көйлек тігіп кимек. Бристоль тұрғыны веб-сайтында киім туралы хабарландыру қалдырған. Оның жанына әйел тігілетін көйлектің сызбасын қосып қойған.

«Менің анам 1953 жылы тұрмысқа шыққан. Ол киген көйлекті қайта тігіп бере алатын адам іздеймін. Анам жуырда қайтыс болғандықтан, оның рухына арнап бір нәрсе жасағым келеді. Көйлек таптырмас естелік деп ойлаймын», — деді әйел.

Әрі қарай ол 2014 жылдан бері анасының шашын қалай жинап келгенін түсіндірді.

«2014 жылы анамның денсаулығы сыр бере бастағанын біліп, сол уақыттан бері шашын жинап келдім. Ол кезде шашы қажетіме жарайды деп еш ойлаған емеспін. Бұл шашты көйлек тіктіргенде пайдаланатын боламын. Одан жең, жаға тігіп, көйлектің төменгі бөлігін безендірмекпін», — деді қалыңдық.

Мұнымен қатар, қалыңдық бұл тапсырысын орындайтын адамға 15 мың еуро (бұл шамамен 6 220 650 теңге) төлейтінін айтты. Ол көйлек 2019 жылдың тамыз айына дейін дайын болады деген үмітте. Себебі, анасы қайтыс болған күні үстіне осы көйлекті кимек.