9-сынып оқушысы жүкті екенін 8-ші айында бір-ақ білген

Нағима есімді бойжеткен сезімге алданып, жүкті болып қалған. Ол былтыр 15 жасында ана атанып, тұңғышын босанды. Алайда, сәбиінің әкесі оның жүктілігін білгеннен кейін хабарсыз кетіпті. Жүкті болып қалған 9-сынып оқушысы аяғының ауыр екенін 8-айда бір-ақ білген. Бұл туралы Еуразия бірінші арнасы хабарлайды, деп жазады stan.kz.

Нағима босаға аттамаған, некесі қиылмаған. Былтыр нәбәрі, 15 жасында ана атанған. Баласының әкесі өзінен 5 жас үлкен екен. Онымен 6-шы сыныпта оқып жүргенінде танысыпты. Үш жылдай кездесіп, сезімге мас болып жүргенінде жүкті болып қалады. Ал аяғының ауыр екенін естіген сүйіктісі жауапкершіліктен жалтарып, ізім-ғайым жоқ болған.

«Мен ішімді қысып жүрдім. Өзімнің аяғым ауыр екенін тек 8 айында ғана білдім. Аяғым ауыр болған кезде 9-сыныпты бітірдім. Анама айта алмадым, батылым бармады. Мен саған көметесемін, баланы екеуміз бағамыз деді. Сеніп қалдым. Бізде үлкен махаббат болған еді. Оған қатты сеніп қалдым», – дейді қала тұрғыны Нағима.

Еліміздегі жастардың үштен бірі жыныстық қатынасты 15 пен 19 жасында бастайды екен. Ал мұның салдары көптеген келеңсіздіктерге әкелуде. Мәселен, венерологиялық аурулар жұқтырған қыздар көбейіп барады. Бұл көрсеткіш әсіресе, 15 пен 17 жастағылар арасында өршіп тұр. Нәтижесінде, ерте жүктілік те белең алуда. Ал мамандар мұның бәрі – отбасындағы тәрбиенің әлсіздігі мен мектепте ерте жыныстық қатынасқа түсудің зияндығын түсіндіретін адамның жоқтығынан болуда дейді.

Сандар жаға ұстатады! Тек былтырдың өзінде түсік жасатқан оқушылардың саны 3 жарым мыңға жеткен. Мәселен, мамандар жүргізген зерттеу барысында 15 пен19-дың аралығындағы бойжеткендердің 16,7 пайызы бұған дейін жүкті болғанын растаған. Ал 22 қыз бала жасанды түсік, сауалнамаға қатысқан 4,5 мыңға жуық қыздың 2 пайызы үйде абортқа барғанын айтыпты. Атап өтерлігі, қаладан гөрі ауыл жастары жалған махаббатқа мастанып, жиі шалыс басады екен.

«Бүгінгі таңда ауылдың жастарымен проблема көп. Ерте жүктіклік ауылдың жастары көш бастап отыр. Себебі, жыныстық тәлім-тәрбиеден жұрдай, одан бөлек жүктілікті алдын алатын контрацептивтік тауарлар оларға қолжетімсіз», – дейді БҰҰ Халықты қоныстандыру саласындағы қорының Қазақстандағы үйлестірушісі Ғазиза Молдағұлова.

«Қазіргі уақыттағы өмір салты кінәлі. Балаға ол тақырыпты қозғаған ерте-ерте деп жүріп, олардың қалай есейіп, осы жағдайға қалай тап болғанын білмей қаламыз. Жыныстық қатынас туралы түсіндіру жұмыстарын олардың денесіндегі табиғи нышандары басталған шақта бастауыңыз қажет. Ол 11-12 жас. Бұл жас баламен ашық сөйлесетін тақырыптар. Оны ең жақын адамы қозғау керек. Жыныстық қарым-қатынас жағындағы тәрбиені өзінің жанындағы ең жақын адамы, қыздың анасы қозғау керек», – дейді психолог Ғалияш Махашева.

Аборт, ерте жүктілік былай тұрсын, венерологиялық аурулар жұқтырған оқушы қыздар да көбейіп барады. Бұл көрсеткіш әсіресе, 15 пен 17 жастағылар арасында өршіп тұр. Мәселен, мектеп оқушыларынан сифилис, гонорея мен трихоминиаз табылған.

«Мәселен, өткен жылғы статистикаға сүйенсек, аталмыш топтағы жастардың арасында 700-ге жуығында жыныстық қатынас арқылы жұғатын инфекция анықталған. Оның 17 пайызы сифилис, 40 пайызы гонорея. Бұл кәдімгідей үлкен проблема, сондықтан тездетіп мәселені қолға алып, мектептерде ашық сабақтар өткізу қажет», – дейді Республикалық ЖИТС-тің алдын алу және оған қарсы күрес орталығының бас директоры Бауыржан Байсеркин.

Таңғалатын жәйт, мұндай жағдай дамыған Еуропа елдерінде некен-саяқ кездеседі екен. Ал мамандар мұның бәрі – отбасындағы тәрбиенің әлсіздігі мен мектепте ерте жыныстық қатынасқа түсудің зияндығын түсіндіретін адамның жоғынан болуда дейді. Жағдай осылай жалғаса берсе, келешекте бұдан да сорақы жағдайлар тіркелуі мүмкін екенін айтады.