Денис Теннің қазасына кінәлі тағы бір адам болуы мүмкін

Денис Теннің өліміне қатысты істе тағы бір күдіктінің бар болуы мүмкін. Бұл жөнінде жәбірленуші жақтың қорғаушысы Нұрлан Өстеміров бүгін өткен сот отырысында мәлімдеді, деп хабарлайды NUR.KZ.

Оксана Тен бастаған жәбірленуші жақтың қорғаушысы оқиға орнынан түсірілген видеода тағы бір адамның болғанын айтып берді.

«Келіспейтін тұстар көп. Пышақ жарақаты 90 градустан жасалған. Қалайша Қиясов оған артында тұрып сондай соққы жасай алды? Ол артынан жүгіріп келді ғой. Денис те қарап тұрған жоқ ол кезде, төбелесті. Ойлап қараңыздар... Оксана Алексеевна видеода тағы бір адамның болғанын айтты. Ол қашып бара жатқан. Демек тағы біреу болған. Не себепті, Қиясов пен Құдайбергенов басында жауап бергенде шатасты? Бірінші Құдайбергенов пышақ сұқтым деді. Кейіннен Қиясов өзі өлтіргенін айтты» , - дейді Нұрлан Өстеміров.

Айта кетейік, бұған дейін Алматыда Денис Теннің өліміне қатысты сот отырысының басталғаны туралы хабарлаған болатынбыз. Жәбірленуші жақ қылмыстық оқиғаныңтапсырыспен жасалғанын алға тартты.