Алматыда жұмбақ жағдайда жоғалып кеткен жігіттің мәйіті табылды

Алматыда жұмбақ жағдайда жоғалып кеткен 24 жастағы жігіттің мәйіті табылды. Әлихан Ишимовтың өлі денесі осыдан екі күн бұрын әуежай маңындағы көлден шыққан. Еске сала кетсек, Әлихан Ишимов 16 қарашада кешкісін үйінен шығып, содан ұшты-күйлі жоғалып кеткен еді. Ертеңіне ол мінген көлікті ата-анасы әуежай маңайындағы көлдің жанынан тапқан болатын. Ең қызығы, көліктің есігі ашық тұрған. Ал ішіндегі жігіттің телефоны мен құжаттарына ешкім қол тигізбеген. Қазір болған жағдайға байланысты тергеу жұмыстары жүргізіліп жатыр. Ал жұмбақ жағдайда жан тапсырған марқұмның денесін туыстары  жер қойнына тапсырды.