Алматылық дәрігерлер қатерлі ісік жайлаған бауырды емдеудің жаңа әдістерін меңгеруде

Алматылық дәрігерлер қатерлі ісік жайлаған бауырды емдеудің жаңа әдістерін меңгеріп жатыр. Алматы онкология орталығында онкологтар химиоэмболизациялық және хирургиялық тәсілдер бойынша шеберлік дәрістерін өткізіп, бірнеше ота жасады. Бұл әдіс - қатерлі ісіктің ұлғайып, денеге жайылып кетуін тоқтатады екен. Былтыр Алматыда мұндай отаның 30-ы жасалған. Ал, биылғы жылдың басынан бері 18 операция сәтті жүргізілген. 

«Біз бүкіл ем тәсілдерінің басын біріктіріп, бір мастер-класс қылып жатырмыз. Оған Ресейден, Белорусиядан 4 белгілі спикерлерді шақырдық. Ол бұрында бізде орталықта болмаған, Қазақстанда да болмаған. Сондай тәсілдер біздің ауруханаға енгізіліп жатыр, болашақта осы ауруханада шоғырланған әдістер орын тауып, халыққа оң нәтижесін береді деген ойдамыз»,- деді Алматы онкологиялық орталығының бас дәрігері, Дамир ДӘУЛЕТБАЕВ.

Онлайн режимінде өткен отаны - Қазақстанның әр өңірінен келген білікті мамандар бақылады. Бұл операциялардың тиімділігі - бауырдың қатерлі ісігіне қарсы егілген химиялық дәрілерден ағзаның өзге мүшелері зардап шекпейді. Дерекке сенсек, елімізде жыл сайын мыңға жуық адам бауыр ісігі ауруына шалдығады. Салдарынан науқастардың 56 пайызы 5 жыл өтпей жан тапсырады. Бауыр қатерлі ісігіне химиялық препараттарды артериялық қан тамырлары арқылы тікелей жіберу Қазақстанда бірінші рет 2011 жылы басталды.