Еліміздің батыс және оңтүстік бөлігінде күн қайта ысиды

Қазгидромет 16 шілдеге дейінгі ауа райы болжамын ұсынды деп хабарлайды Sputnik.kz.

«Тропосфералық процестердің қайта құрыла басталуы Сирия және Ирак аймағынан ыстық ауа массаларын Қазақстанның батыс бөлігіне және республиканың оңтүстігіне әкеледі», – деп хабарлайды синоптиктер.

Оның ықпалынан ауа райы жауын-шашынсыз болады, температура плюс 40-43°С дейін қайта көтеріледі.

Ал республиканың шығыс бөлігіне Сібірден салқын және дымқыл ауа біртіндеп түсе бастайды. Сондықтан мұнда жылы ауа-райы сақталады, кей жерлерде найзағай, екпінді жел мен өткінші жаңбыр болжанады.

Ауа температурасы орташа көпжылдық мәнге жақын болады, бірақ батыс облыстарда қалыпты нормадан 3-7°С жылырақ болады.