ҚР Білім және ғылым министрі Ерлан Сағадиев қыркүйек айынан бастап аттестациядан өткен мұғалімдердің үстеме ақы алатынын мәлімдеді, деп xабарлайды ҚазАқпарат.
«Биыл педагогтарды аттестациядан өткізудің жаңа жүйесі енгізілді. Аттестациялауға 60 мыңға жуық мұғалім қатысты. Олардың ішінде 36 мыңнан астамы аттестациядан өтті. Ол 63 пайызды құрайды. Осы жылдың қыркүйек айынан бастап аттестациядан өткен мұғалімдерге алған категорияларына қарай үстеме ақы төленеді», – деді Е.Сағадиев Үкіметтің бүгінгі отырысында.
Айта кетейік, аттестацияның нәтижесі бойынша 50 пайызға дейінгі үстеме ақы қарастырылған. Бұдан бөлек, бүгінде жаңартылған білім мазмұны бойынша сабақ беретін мұғалімдерге 30 пайыздық ақы төленіп жатыр. Өткен жылы 1, 2, 5 және 7-сыныптар жаңа оқу бағдарламасына көшсе, биылдан бастап 3, 6 және 8-сыныптар жаңартылған мазмұн бойынша білім ала бастайды. Демек, осы сыныптардың мұғалімдері де 30 пайыздық қосымша ақы алатын болады.
Министрдің сөзіне қарағанда, осы жылдың аяғына дейін мектеп оқушыларының 75 проценті жаңартылған мазмұн бойынша оқиды.
«Екі жылда шамамен, 150 мың мұғалім арнайы курстан өтті. Қазіргі уақытта 73 мың педагог оқып жатыр. Жаңартылған мазмұн бойынша сабақ беретін мұғалімдердің жалпы саны – 205 мың адам. Бүгінде олардың 67 пайызының жалақы көлемі 30 пайызға көбейді», – деп атап көрсетті Е.Сағадиев.
Айта кетейік, алдағы уақытта ұлттық бірыңғай тестілеу тәртібіне бірқатар өзгерістер енгізілуі мүмкін. Аталған өзгерістер іске асса, мұғалімдердің бос уақыты көбейеді.
