Қазақстан жанармай бағасы арзан 167 мемлекеттің арасында 15-ші орынды иеленді

Елімізде төртінші мұнай өңдеу зауыты салынуы мүмкін. Қанат Бозымбаев жұмыстың алдын ала жоспарын тікелей өз бақылауына алмақ. Бұл туралы Энергетика министрлігің кеңейтілген отырысында мәлім болды. Ал ведомство басшысы бензин бағасына келгенде кібіртіктеп қалды.

Энергетика министрінің жиынына келген журналистер аз болған жоқ. Себебі, жанармай тапшылығымен қатты танылған министрге қойылар сұрақ көп. Тілшілер ең әуелі көптен бері қозғалып жүрген төртінші мұнай өңдеу зауытын салуға қатысты сұрақ қойды. 

«Елбасы тапсырмасы бойынша біз кезекті мұнай өңдеу зауытын салу мәселесін қарастырып жатырмыз. Сұраныс күшейген сайын, тапшылық орын алып отыр. Демек, жанармай мен дизельдік отын 2021-2023 жылға дейін жеткілікті болуы тиіс. Сонымен қатар, 2026 жылға дейінгі авиакеросин  тапшылығын жою қаже», - деді ҚР Энергетика министрі Қанат БОЗЫМБАЕВ.

Жиында Қазақстанның «арзан жағармай» сататын мемлекеттер рейтінгінде 15 орынға жайғасқаны белгілі болды. Бізден төмен баға тек Түркменстанда, дейді министр. Оның айтуынша, әлемде жанармай бағасының орта деңгейі 1 доллар 15 центті құрайды екен.

«Талдау жұмыстарын жүргізу үшін жоғары октандық жанармай мен дизельдік отын бағасы қолданылады. Рейтингте 167 елдің мәліметі ескеріледі. Ол ақпарды халықаралық валюта қоры пайдаланады. Осы талдау барысы негізінде Қазақстан 19 ақпанда 15 орынға ілінді. Демек, 1 литр жағармай бағасы бар болғаны 56 цент», - деді  ҚР Энергетика министрі Қанат БОЗЫМБАЕВ.

Ведомство басшысы мұнай бағасына қатысты ойын айтты. Болжамы бойынша, «Brent» маркалы мұнайдың бір баррелі биыл орта есеппен 55-60 долларға тұрақтайды. Ал жанармай бағасына келгенде нақты пікір айта алмады. Бір анығы - бензин бағасы төмендемейді.

«Ресей Федерациясымен ашық шекара жүйесінде жұмыс атқарып жатқаннан кейін, әрі Еуразиялық одақ аясында болған соң жағармай бағасының  түсетініне күмәнім бар. Бірақ біз жергілікті ресурстар арқылы, әрі бензин бағасының көтерілмеуін қадағалаудамыз. Бүгінгі күні сол тұрақтылықты сақтап отырмыз», - деді ҚР Энергетика министрі Қанат БОЗЫМБАЕВ.

Сонымен қатар, отандық мұнай өңдеуші зауыттардың жағдайы да сөз болды. Олар ішкі нарықты қарық қылуға қауқарлы екен. Демек, жанармай бекеттерін біздің өнім 90 пайызға қамтуы тиіс. Ведомство таратқан ақпар бойынша мұнай өндіру биыл 870 млн тоннаны құрайды. Өнімнің басым бөлігін «Қашаған» бермек. Ал Қызылорда мен Ақтөбедегі нысандар керісінше, аз өнім алады. Оған аймақтағы табиғаттың түгесілуі басты себеп көрінеді.

Назым Мәлікқызы, Нұрлан Өтегенов, «Алматы» телеарнасы Астанадан