Оңтүстік Қазақстан облысында 7 миллион теңге пара алған қос шенеунік қолға түсті

Оңтүстік Қазақстан облысында 7 миллион теңге пара алған қос шенеунік қолға түсті. Бұл туралы Сыбайлас жемқорлыққа қарсы іс-қимыл ұлттық бюросы мәлімдеді. Аталмыш агенттіктің Оңтүстік өңірдегі департаменті кеше Оңтүстік Қазақстан облыстық тексеру комиссиясының төрағасы Сырым Шалабай мен облыстың тексеру комиссиясының бас аудиторы Біржан Құдияровты қолға түсірген. Тексеріс кезінде олардың 7 миллион теңге көлемінде пара алғаны әшкереленді. Көп ұзамай ақшаға құныққан қос шенеунік уақытша ұстау изоляторына қамалған болатын. Алайда, Құдияров қылмысын толықтай мойындауына байланысты бостандыққа жіберіліпті. Дегенмен, қазір бұл іске қатысты сотқа дейінгі тергеу жүргізіліп жатыр.