Елімізде 26 мыңнан астам адам талма ауруына шалдыққан

Елімізде 26 мыңнан астам адам талма ауруына шалдыққан. Ал балалары осы аурумен сырқаттанатын ата-аналардан құрылған қоғамдық қор өкілдері, бұл тек ресми мәлімет қана екенін айтады. Олардың пікірінше, бұл көрсеткіш едәуір жоғары. Сондай-ақ, «Кең Жүрек» қоғамдық қоры елімізде талма ауруымен ауыратын 3 жасқа дейінгі балаларды сауықтыруға жеткілікті ден қойылмағандығын алға тартады.

Алматылық Айдана Мұхтарқызы тұңғыш қызы Хафизаның аяққа тұрып кетуі үшін емдеудің барлық түріне жүгініп көрген. Айы-күні толмай, уақытынан ерте дүниеге келген қызы 3 айлығында талма ауруымен сырқаттанады. Олар түрлі сараптамалар жасап, тіпті шетел асып емделіп келген.

«Біздің Қазақстанның медицинасы, еліміздің мамандарының білім дәрежесі, қабілеттері шетелдің мамандарынан кем емес. Тек бір айта кететін жағдай, эпилепсиямен ауыратын балалардың сауықтыру жағынан қиын бізге. Мысалы, судорга болып жатқан кезде баланың судоргасымен күресіп жүреміз де, физикалық тұрғыдан артта қалып кетеді. Сол себепті, қатар алып жүру үшін бізге сондай мамандар аз, орталықтар жоқтың қасы»,- деді Қала тұрғыны, Айдана ӘЛДИБЕКОВА.

Қазір Айдана қызына құрамында май мөлшері жоғарылатылған кетогенді диетаны қолдануға жөн көріпті. Осы арқылы оның баласының беті бері қарай бастаған. Ал мамандар әсіресе балаларға эпилепсия диагнозын қою өте қиынға түсетінін айтады.  

«Бізде кейде балаларға диагноз дұрыс қойылмай қалады. Эпилепсия ауруының кейбір түрлері адам генетикасына байланысты. Осындай диагноз қойған ата-аналар кейде қатты ренжіп, кетіп қалып жатады. Олар генетика дегеннің не екенін түсіне бермейді. Бұл дегеніміз қоғамда генетикалық ұғымның аз таралғанын білдіреді. Қазір генетикалық аурулардың жаңа түрлері пайда болып жатыр»,- деді «Балалар неврологтары қауымдастығының» президенті, Маржан ЛЕПЕСОВА.

Қазір елімізде балалар арасындағы талма ауруына қатысты түрлі мәселелермен күресіп жүрген жалғыз қоғамдық қор бар. Қор өкілдері бұл салада түрлі кемшін тұстар барын алға тартады. Ата-аналардан құрылған ұйым эпилепсия ауруына мемлекет тарапынан тиісті көңіл бөлінсе дейді.

«Жұрт эпилепсия ауруын естігенде тек талып қалу деп қана ойлайды. Негізінде бұл сырқаттың 40-тан астам түрі бар. Оны анықтау да қиынға түседі. Ал ауруды баланың ерте кезінде анықтамаса оны есейе келе емдеу өте қиын. Елімізде тек 3 жасқа дейінгі балаларға кешенді сауықтыру көмегі қарастырылмаған. Тек бірнеше сағат көрсетілетін орталықтар ғана бар. Алайдағ олардан нәтиже аса білінбейді. Ал баланың толық психологиялық, физикалық жағынан дамуы үшін күнде жұмыс жасау керек»,- деді «Кең жарық» қоғамдық қорының директоры, Мадина БЕЙСЕМБАЕВА.

Дүниежүзілік денсаулық сақтау ұйымының мәліметінше әлемде талма ауруына адамдардың 75 пайызы шылдыққан. Ал отандық эпилептологтар Алматыда 2000-нан астам бала неврологиялық сырқатпен ауыратынын мәлімдеген.

Назкен Байтілес, Валерии Таубалдиева, «Алматы» телеарнасы