Бауыржан Айткаримов: Қазақ жастарының әлемнің түкпір-түкпірінде қызмет етуге барлық мүмкіндік бар

Білім мазмұнын дамыту институтының директоры Бауыржан Айткаримов ҚР Президенті Қасым-Жомарт Тоқаевтың «Qazaqstan» телеарнасына берген сұхбатына қатысты пікір білдірді, деп хабарлайды Almaty.tv тілшісі.

«Президент Қасым-Жомарт Кемелұлы Тоқаевтың арнайы сұхбатын көрдім. Еліміздегі жастар өкілі ретінде «Жаңа Қазақстанды» құру идеясы бей-жай қалдырмады. Болашағымызға деген сенім, әділетті мемлекет құруға талпыныс пайда болды.  Әсіресе, саяси, экономикалық реформалардың жоспарланып отырғандығы көңілге қуаныш ұялатты», – деді Білім мазмұнын дамыту институтының директоры.

Сонымен қатар Бауыржан Айткаримов қазақ жастарының әлемнің түкпір-түкпірінде қызмет етуге барлық мүмкіндік барын тілге тиек етті.    

«Қазақстан азаматтарының шет елде оқып, еңбек етіп, тәжірибе алуындағы идеалогиялық қателіктерге байланысты айтылған Президент ойлары да орынды деп білемін. Масылдық санадан арылып, әлемнің қай түкпірінде болсын еңбек етуге қазір барлық мүмкіндік бар. Осы тұста,  Білім мазмұнын дамыту институты еуропада оқып жатқан қазақ ғалымдарымен бірлесіп, мектеп мұғалімдерінің біліктілігін арттырып, білім саясатын зерттеу жұмыстарын жүргізіп жатқанын айта кеткім келеді», – деді ол.