Наурызбай ауданының барлық көшесі 2024 жылдың соңына дейін жарықпен қамтылады

Алматы әкімі Ерболат Досаев Наурызбай ауданының тұрғындарымен кездесуде атап өткендей, ауданды энергиямен тұрақты әрі үздіксіз жабдықтау - маңызды мәселе, деп хабарлайды Аlmaty.tv. 

- Наурызбай ауданының желілері Алматыға қосылған сәтте тозған болатын, - деді қала басшысы.  

Оның айтуынша, 2023 жылы желілерді жаңғырту аясында Ақжар, Қарағайлы, Құрамыс, Рахат, Таусамалы және Шұғыла шағынаудандарында 23,2 км электр желілері мен 2 трансформаторлық қосалқы станция ауыстырылып, жөнделді.

Сәуір айының соңына дейін 3 км электр беру желілерін жөндеп, Шұғыла  шағынауданына  22 трансформаторлық қосалқы станция орнату жоспарлануда. Жыл соңына дейін Алматы әкімдігінің жоспары бойынша 128 км электр беру желілері мен 19 трансформаторлық қосалқы станциялар жөнделеді.

- Сыртқы жарықтандыруға ерекше назар аударылады. 2023 жылы 59 көшеде ұзындығы 43 км сыртқы жарықтандыру қамтамасыз етілді, аудандарға көше жарығына қызмет көрсету бойынша берілген функцияны ескере отырып, өтінімдерді пысықтау уақыты айтарлықтай қысқарды. Нәтижесінде 2023 жылдың соңғы 3 айында 17,6 км кабель желісі ауыстырылып, 1840 шам орнатылды, - деді Алматы әкімі.

Ерболат Досаев 2024 жылға 87 км әуе және кабель желілерін жаңғырту, 3,5 мың жарықтандыру шамдарын және 230 саябақ шамдарын ауыстыру жоспарланғанын атап өтті, оған 1,1 млрд теңге бөлінді.  ХҚБ бағдарламасы бойынша ауданның барлық жарығы жоқ көшелерін 2024 жылдың соңына дейін жарықтандыру жоспарлануда.

Оқи отырыңыз: «Ақжар» шағын ауданында спорт кешенінің құрылысы басталады