Алматыда ерекше қажеттілігі бар азаматтарды жұмыспен қамту қалай жүргізілуде

Алматыда ерекше қажеттілігі бар 2 мыңнан астам азамат 2024 жылдың соңына дейін жұмыспен қамтылады, деп хабарлайды Аlmaty.tv.

Қала басшысы Ерболат Досаевтың тапсырмасы шеңберінде біліктілігін арттырып, еңбек ұтқырлығы орталығы арқылы оқудан өтуге мүмкіндік алады. Сондай-ақ оларға «Ten Qogam» орталықтары арқылы кәсіптік терапия мен кәсіби дағдыларды дамыту бойынша қызметтер қолжетімді болады. Бұл туралы Алматы қаласы әкімінің орынбасары Әсем Нүсіпова Алматы қаласының Инклюзивті ортаны дамыту жөніндегі кеңестің бірінші отырысында хабарлады.

- 2023 жылы Еңбек ұтқырлығы орталығына ерекше қажеттілігі бар 2860 азамат жүгініп, 1965 адам жұмыспен қамтылды. Бұл ретте 244 адам тұрақты жұмыс орындарына, 502 адам әлеуметтік жұмыс орындарына, 661 адам «Бастау бизнес» бағдарламасы бойынша оқуға жіберілді, - деп атап өтті Әсем Нүсіпова.

Оның айтуынша, биыл жыл басынан бері Еңбек ұтқырлығы орталығына ерекше қажеттілігі бар 993 азамат жүгінген. 533 адам жұмыспен қамту шараларымен қамтылса, ал 2024 жылдың соңына дейін жұмыспен қамту шараларымен кемінде 2,2 мың адамды қамту жоспарда бар.

- Біздің басты міндетіміз – азаматтардың өзін-өзі тануы, еңбегі үшін материалдық сыйақы алуы үшін ынталандырулар жасау және, тиісінше, олардың өмір сүру сапасын арттыру. Бұл жалақының кемінде 70% субсидиялау арқылы, сондай-ақ жұмыс берушілердің арнайы жұмыс орындарын жабдықтауға арналған жабдықтарды сатып алуға және орнатуға жұмсаған шығындарын өтеу арқылы жүзеге асырылады, - деді Алматы қаласы әкімінің орынбасары.

Айта кетейік, Еңбек ұтқырлығы орталығы арнайы жұмыс орындарын жабдықтауға арналған жабдықтарды сатып алу және орнату шығындарын өтеуді жүзеге асырады. Бұл жұмыс берушілерге ерекше қажеттілігі бар адамдарды жұмысқа жалдауға көбірек мүмкіндік береді.

Оқи отырыңыз: Инклюзивті Алматы: мегаполисте кедергісіз орта құру үшін қандай шаралар жүргізілуде