Алматы тұрғындары МӘМС есебінен медициналық көмек алды

Елімізде екінші жыл медициналық сақтандыру жүйесі жұмыс істеп жатыр. Оның басталуы пандемия кезеңімен тұспа-тұс келді, алайда коронавируспен үздіксіз күреске қарамастан, МӘМС медициналық сақтандыру жүйесінің толыққанды жұмыс істейтінін көрсетті. Медициналық сақтандырудың арқасында Алматы қаласының денсаулық сақтау жүйесі 2021 жылы 214 млрд теңгеден астам қаржы алды. Алматы қаласының әлеуметтік медициналық сақтандыру қорының басшысы Тілеухан Әбілдаев Өңірлік коммуникациялар қызметінде өткен брифингте жаңа жүйенің жетістігі туралы айтып берді, деп хабарлайды Almaty.tv.

Қор өкілі Т. Әбілдаевтың айтуынша, МӘМС енгізілгеннен кейін Алматы қаласының денсаулық сақтау бюджеті едәуір өсті.

«2021 жылға нақтыланған бюджет 214,6 млрд.теңгені құрап, 2020 жылғы бюджеттен 3%-ға өсті, оның ішінде ТМККК шеңберінде 127,1 млрд. теңге, МӘМС пакетінде 87,5 млрд. теңге», – деп хабарлады спикер.

Өткен жылмен салыстырғанда жоғары технологиялық операцияларды қаржыландыру артты. Егер 2020 жылы оларды жүргізуге 11,8 млрд теңге бөлінсе, биыл 12,9 млрд теңге бөлінді.

Т. Әбілдаев міндетті медициналық сақтандырудың арқасында ЭКО сияқты қымбат қызметтер қолжетімді бола бастағанын атап өтті.

«Мысалы, егер 2020 жылы 563 млн теңге сомасында 643 ЭКО манипуляциясы жүргізілсе, биыл 1238 қызметке 1,1 млрд теңге бөлінді. Өсім 2 есе байқалады. Осы жылдың 4 айында сомасы 434 млн теңгеге ЭКО-ның 459 рәсімі өткізілді», – деп хабарлады медициналық сақтандыру қорының өкілі.

Сондай-ақ, өткен жылы 184 кардиохирургиялық ота жасалды, биыл 631 млн теңгеге 270 қызмет көрсету жоспарланған.

Қор осы жылдың 4 айында Алматы қаласы бойынша МӘМС пакетінде медициналық көмекке ақы төлеуге шамамен 42,6 млрд теңге жұмсады.

Қор халыққа жоғары технологиялық қызмет көрсеткені үшін 6,3 млрд теңгеден астам қаражат төледі, тағы 2 млрд теңге күндізгі стационар қызметтерін төлеуге бағытталды.

МӘМС жүйесі аясында жоспарлы скринингтерге 400 млн теңге, оңалту көмегіне 3 млрд теңге бөлінді. Оңалту қызметтеріне 7,7 млрд теңге бөлінді. Бұл медициналық сақтандыру бастамаларының бірі – халық үшін оңалтудың қолжетімділігін арттыру.

Жыл сайын оңалтуды ұсынушылар саны артып келеді. Мысалы, егер 2019 жылы қалада оңалту қызметтерін тек 4 емхана көрсеткен болса, қазір жеткізушілер саны 73-ке жетті. Биыл 5 жаңа жеткізуші Қормен келісімшартқа отырды.