Алматы жылу беру маусымына 100% дайын

Алматыдағы қазандықтар алдағы жылыту маусымына толық дайын. Бұл туралы Алматы қаласы Энерготиімділік және инфрақұрылымдық даму басқармасының басшысы Евгений Пак Өңірлік коммуникациялар қызметінің баспасөз конференциясы барысында мәлімдеді, деп хабарлайды Almaty.tv.

Е. Пактың айтуынша, жылыту маусымына 8257 тұрғын үй, 443 білім беру және 91 денсаулық сақтау объектілері дайын тұр.

«Жылыту маусымына дайындық мамыр айында басталды. Гидравликалық сынақтар жүргізілді, нәтижесінде 626 зақым анықталды және жойылды. 82 қазандықта жөндеу жұмыстары жүргізілді, қазандықтарды ауыстырумен технологиялық және қосалқы жабдықтар жөнделді, газ жабдықтары ауыстырылды. Биыл Наурызбай ауданындағы Вокзал қазандығын, сондай-ақ «Премьера» қазандығын қайта жаңарту басталды», – деді Энерготиімділік және инфрақұрылымдық даму басқармасының басшысы 2021-2022 жылдардағы қыс мезгіліне дайындық туралы.

Сонымен қатар Е. Пак 82 қалалық қазандықтарда және жылу көздерінде, тұрақты түрде, төрт ауысымда жедел персонал тәулік бойы кезекшілік ететінін айтты. 

Авария кезінде 13 жедел және жөндеу бригадасы жұмыс істейді. Сондай-ақ 229 мың тонна көмір мен 23,4 мың тонна мазуттың авариялық резерві жинақталды.

Барлығы Алматыда Түрксіб пен Жетісу аудандарында халыққа арналған 8 көмір базасы бар, алдын ала 90 мың тонна көмір қорын жинау жоспарланған. Бүгінде 27 мың тонна қор жиналды, тағы 3,5 мыңы тасымалданады.

Сөзін жалғастырған Е. Пак электр және газ желілерінің дайындығы туралы айтты. 

Оның айтуынша, Алматыда электр желісінің ұзындығы 8,5 мың шақырымды құрайды. Олардың дайындығы – 100%. «Алатау Жарық Компаниясы» АҚ 871 шақырым электр желілерінде жөндеу жұмыстарын жүргізді. Өз кезегінде, Алматыдағы «ҚазТрансГаз Аймақ» АҚ 4746 шақырым газ желілерін басқарады, олар да суық ауа райының басталуына толық дайын.

Сонымен қатар Е. Пак Алматы қаласындағы үйлердің 94,5%-ы жылуды есепке алатын қондырғыларға қосылғанын, қалғандары казарма типіндегі үйлер екенін немесе апатты үйлерге тиесілі екенін тілге тиек етті.

Басқарма басшысы Алматыда ауа температурасы төмендегенде жылу берілетінін айтты.