Алматы қаласы мәслихатының рөлі күшейтілді

Алматы қаласы мәслихатының рөлі күшейтілді, деп хабарлайды Almaty.tv.

Алматы Өңірлік коммуникациялар қызметінің алаңында Алматы қаласы Қоғамдық Кеңесінің төрағасы, Алматы қаласы мәслихатының депутаты, экономика, қаржы, активтер, мемлекеттік басқару мен қоғамдық қауіпсіздікті дамыту жөніндегі тұрақты комиссияның мүшесі Алтынай Көбеева және оның әріптесі, Алматы қаласы мәслихатының депутаты, денсаулық сақтау, білім беру және жұмыспен қамту жөніндегі тұрақты комиссияның мүшесі Төлеуғали Тайтулеевтің қатысуымен брифинг өтті.

Мәслихаттар жергілікті өкілді билік органдары ретінде мемлекет пен қоғам коммуникацияларының жаңа құрылымының маңызды элементі болып табылады.

«Мемлекет басшысы Жолдауда Қазақстанның жергілікті өзін-өзі басқару жүйесіне біртіндеп көшуі туралы мәлімдеді. Мәслихаттар да осы жүйенің негізгі буыны болады. Мемлекет басшысының пікірінше, тұрғындар бұрыннан өз қалалары, аудандары, ауылдары үшін жауапкершілік алуы керек. Адамға сенім білдіріп, қолына билік беруден қорықпау қажет», - деп бастады А. Көбеева.

Депутат Көбеева Алматы Қоғамдық кеңесінің бекітілген жаңа құрамы туралы да айтты, оның негізі ҮЕҰ мен БАҚ өкілдерінен тұрады. Оның айтуынша, онда білім беру саласы өкілдерінің үлесі артты, сондай-ақ құрылымға көпбалалы аналар кірді.

«Мамыр айында Қоғамдық кеңестің үшінші құрамы құрылды. Оған 39 адам кірді. Егер пайыздық арақатынаста ҮЕҰ мен БАҚ үлесі 51%-ды құраса, мемлекеттік органдар үш адамды құрайды – бұл 7%. Бүгінде қоғамдық бақылаудың төрт нысаны бекітілген. Бұл қоғамдық мониторинг, қоғамдық тыңдаулар, нормативтік-құқықтық құжаттарды сараптау және мемлекеттік органдардың есептерін тыңдау», - деді А. Көбеева.

Қазірдің өзінде Қоғамдық кеңестің, төралқаның, комиссиялардың 14 отырысы өткізіліп, онда 62 мәселе қаралды. Нормативтік-құқықтық құжаттар бойынша 17 қоғамдық мониторинг және 10 сараптама жүргізілді. Кеңеске Алматы қаласының тұрғындарынан 120-дан астам өтініш келіп түсті.

Журналистердің сұрақтарына жауап бере отырып, Төлеуғали Тайтулеев Президент мемлекет пен жергілікті өзін-өзі басқару институттары функцияларының тиімді аражігін ажырату қажеттігін атап өтті. Ол осыған байланысты Алматы мәслихатының жұмысында қандай өзгерістер күтіліп отырғанын айтты.

«Қазіргі уақытта заңнамаға Мемлекет басшысы баламалы негізде ұсынған мәслихат депутаттарының қала әкімі лауазымына кемінде екі кандидатқа дауыс беру құқығын реттейтін өзгерістер енгізілді. Енді президент мәслихаттағы пікірлерді ескере отырып, облыстар мен Республикалық маңызы бар қалалардың әкімдерін тағайындайды», - деді Т. Тайтулеев.

Атқарушы билік тармағын ауыстыру жөніндегі осы жаңашылдықтардың барлығы жоғары саяси мәдениеті бар Жаңа Қазақстанды құруға бағытталған.

Сондай-ақ, Төлеуғали Тайтулеев жергілікті өкілді органдардың жұмысы бүкілхалықтық референдум нәтижелері бойынша қабылданған конституциялық реформалар шеңберінде бірқатар бағыттар бойынша жақсартылатынын хабарлады. Атап айтқанда, мәслихаттардың дербестігін және олардың жұмысының тиімділігін арттыру мақсатында халық мүддесі үшін мәслихат төрағасы лауазымы енгізілетін болады.

«Бірқатар өзгерістерде мәслихат депутаттарының 50%-ы азаматтардың тікелей дауыс беруімен сайланатын болады. Бұл депутаттардың жауапкершілігін айтарлықтай арттыратынына күмән жоқ. Бұл өзгерістер конституциялық реформалар шеңберінде іске асырылатын болады. Осылайша саяси партиялар арасында бәсекелестік күшейеді деп ойлаймын», - деді Т. Тайтулеев.

Депутат «Алматының ерекше мәртебесі туралы» Заңға өзгерістер енгізу аясында мәслихаттарға қандай өкілеттіктер берілгенін айтып берді. Мысалы, бұдан былай мәслихатқа бұрын-соңды болмаған өкілеттік берілген. Бұл Алматы қаласының қала құрылысы кодексін бекіту, жылжымайтын мүлікті тіркеу мәселелерін қарау үшін комиссия құру, оның құрамы мен ережесін бекіту, Алматы қаласында сыртқы жарықтандыру жүйелерін пайдалану қағидаттарын бекіту және басқалар.

Дереккөз: Алматы қаласының ӨКҚ