Алматыда жолды сапасыз жөндеген бірнеше компанияға айыппұл тағылды

Алматыда жауапсыз мердігерлерге қатысты шара күшейтілді, деп хабарлайды Almaty.tv тілшісі ҚазАқпаратқа сілтеме жасап.

Қала әкімінің тапсырмасымен негізгі көшелерде, квартал аралық көшелер мен аулаларда құрылыс-монтаж жұмыстарын жүргізетін құрылыс компанияларына қойылатын талап күшейтілді. 

Бұл шара мердігер компаниялардың жауапкершілігін арттыруға, сондай-ақ қала тұрғындарының жайлылығы мен қауіпсіздігін қамтамасыз етуге және көлік қозғалысына барынша кедергі келтірмеуі үшін қолға алынды. 

Алматы қалалық құрылыс бақылау басқармасы сапасыз құрылыс-монтаждау жұмыстарын жүргізген алты субьектіні ҚР Әкімшілік кодексінің 312-бабы, 1-бөлігі бойынша жауапкершілікке тартты. 

Атап айтсақ, «АЖК» АҚ, «Электрокабель зауыты» ЖШС, «Кристалл ММС» ЖШС, «Бадимус Строй» ЖШС, «Сұңқар» ЖШС,«Сигма» ЖШС. Аталған компанияларға 8 млн теңгеден астам айыппұл салынды. 

«Бұл бағыттағы жұмыстар жалғасады»,– дейді қала басшылығы.