Ленинград блокадасының ардагеріне Санкт-Петербургке бару үшін қаражат бөлінеді

Алмапты қаласының VIII шақырылған мәслихатының кезекті XV сессиясында «Ленинград қаласының кәсіпорындарында, мекемелері мен ұйымдарында блокада кезеңінде жұмыс істеген және «Ленинградты қорғағаны үшін» медалімен немесе «Ленинград блокадасының тұрғыны» төсбелгісімен наградталған Алматы қаласында тұратын азаматтарға Санкт-Петербург қаласына жол жүру шығындарын өтеуге әлеуметтік көмек туралы шешімге өзгерістер қабылданды, деп хабарлайды Almaty.tv.

Қалалық жұмыспен қамту және әлеуметтік бағдарламалар басқармасының басшысы Бауыржан Жаубасовтың айтуынша, Алматыда осы талаптарға сай келетін бір ғана ардагер тұрады.

Өзгерістер мемлекеттік басқару жүйесін орталықсыздандырумен және әлеуметтік көмек көрсету жөніндегі функцияларды Алматы қаласы аудандарының әкімдіктеріне берумен байланысты.

«ҰОС ардагерлерінің Санкт-Петербург қаласына баруын қамтамасыз ету бойынша әлеуметтік көмек көрсету тәртібін айқындайтын мәслихат шешіміне нақтылау енгізу қажет. Тиісті өзгеріс төлемдер екінші деңгейдегі банктер әрі аудан әкімдіктері арқылы ҰОС ардагерінің шотына тікелей жүргізілетінін қарастырады. Бүгінде бұл Әуезов ауданы. Жалпы, қосымша қаржы қажет емес, біз орталықсыздандыру шараларына сәйкес келтіреміз», - деп атап өтті басқарма басшысы.

«Алматыда жыл сайын Санкт-Петербургке барып, туыстарымен кездесіп, естелік орындарда болатын бір ғана ардагер бар. Бұл сапарға шамамен 300 мың теңге бөлінеді, толық көлемде төленеді, қаражат қарастырылған», - деп қорытындылады сөзін Бауыржан Жаубасов.

Оқи отырыңыз: Алматыда 2025 жылға қарай 22 жаңа мектеп пайда болады