Ержан Бабақұмаров Президенттің атынан Алматыдағы балалар үйінің тәрбиеленушілерін мерекемен құттықтады

Мегаполис әкімінің орынбасары Е. Бабақұмаров «Жанұя» арнайы кешеніне, сондай-ақ президенттік шыршалар өткен «Алматыдағы SOS Балалар ауылына барды, деп хабарлайды Almaty.tv.

Е. Бабақұмаров Президент Қ.-Ж. Тоқаевтың атынан балаларға денсаулық, табыс, жақсы достар және тілектерінің орындалуын тіледі. Қалыптасқан жақсы дәстүр бойынша қойылымға қатысушылар жаңа жылдық шыршаны жағып, Аяз Ата мен Ақшақарға тілектерін білдірді.

«Жанұя» кешені 1999 жылы құрылған және 350 тәрбиеленушіге арналған. Бұл жетім және мүмкіндігі шектеулі балаларға арналған балабақша мен түзету мектебін қамтитын арнайы балалар үйі. Оқыту мен тәрбиелеу арнайы түзету бағдарламалары бойынша жүргізіледі. Балаларды тәрбиелеуде тәжірибелі педагогтар мен психологтар көмектеседі.

«Күллі ел болып осындай мерекелік шара өтіп жатыр. Біздің ерекше балаларымызға осындай қамқорлық көрсетіліп, мейірім мен көңіл бөлініп жатқанына алғыс айтамыз. Жалпы, мекемеде қазір 505 бала тәрбиеленеді. Соның ішіндегі 93 бала ата-анасыз қалған», – деді «Жанұя» арнайы мамандандырылған кешені директорының міндетін атқарушы Марина Дәулетбекова.

«Алматыдағы SOS балалар ауылы» 1997 жылы ашылды. Қазір 10 отбасылық үйде 65 бала тұрады. Тағы бес отбасы қалада, «интеграцияланған отбасыларда» бөлек тұрады. Бұл отбасылардағы жеткіншектер де балалар ауылында тұратындар сияқты қамқорлық пен қолдауға ие.

«Әрбір отбасыдағы сияқты мұнда менің де жеті балам бар. 3-еуі қыз, 4-еуі ұл. Балаларға өз туған анасынан артық қарамасам, кем көрмеймін. Барлық жағдайын жасаймын, яғни ас әзірлеп, өмірге үйретіп, білім алуға көмектесемін», – дейді тәрбиелеуші-ана Әлия Нұршапаева.

«Келер жылы ауылымыздың құрылғанына 25 жыл толады. Бұл елде пайда болған ең алғашқы балалар ауылы. Оның қабырғасын Сара Алпысқызы Назарбаева өзі қалап, негізін салды. Мекеме осы күнге дейін жұмысын сәтті жалғастырып келеді», – деді Алматы SOS балалар ауылының директоры Валерий Дубровский.