Алматы әкімі Алмалы ауданының тұрғындарымен кездесті

Алматы әкімі Ерболат Досаевтың халықпен жетінші кездесуі Алмалы ауданында өтті. Іс-шараға 500-ден астам қала тұрғындары келді, деп хабарлайды Almaty.tv.

Әкімнің мәліметінше, Алмалы ауданы сервис пен жайлы тұрудың жоғары стандарттарын белгілейді және Алматының ең тығыз қоныстанған ауданы болып табылады.

Халықпен кездесу барысында Алматы әкімі ауданның негізгі проблемалық мәселелерін, соның ішінде инженерлік желілердің тозуы, әлеуметтік нысандардың шамадан тыс жүктелуі, қауіпсіздік, сондай-ақ абаттандыру және тарихи орталықты сақтау мәселелерін атап өтті.

Бүгінде ауданда негізгі проблема өткен ғасырдың 60-жылдары салынған инженерлік желілердің тозуы болып табылады. Электр энергетикасында тозу 70%-ды құрайды. Ерболат Досаев қазіргі уақытта желілерді жаңарту бойынша жоспарлы жұмыстар жүргізіліп жатқанын атап өтті.

Биыл 81 шақырым кабель желісі жаңғыртылады. Бұл ауданның 91 мың тұрғынын үздіксіз электр энергиясымен қамтамасыз етіп, желілердің тозуын 60%-ға дейін төмендетеді. Сумен жабдықтау бойынша тозу 72,6%-ды құрайды, бұл қала бойынша орташа көрсеткіштен 17,6%-ға жоғары. Биыл Тұрғыт Озал көшесіндегі Абайдан Есенжанов пен Байтұрсыновқа дейінгі Төле биден Әйтеке биге дейінгі су құбыры қайта жаңғыртылады.

Әлеуметтік салада нысандармен қамтамасыз ету басқа аудандарға қарағанда жоғары, деп атап өтті Ерболат Досаев. Оның айтуынша, Алмалы ауданының мектептері мен балабақшаларындағы оқушы орындарының тапшылығы 4,1 мың орынды құрайды. Биыл 850 орындық екі қосымша құрылыс (№34 және 144 гимназияларға) енгізілді. № 15 гимназияны сейсмикалық күшейту бойынша күрделі жөндеу жұмыстары басталды. №16 мектепке қосымша нысан салуға жобалық құжаттаманы әзірлеу жоспарда бар.

Мектепке дейінгі білім беру объектілері бойынша № 43 балабақша ғимаратының бұрын жекешелендірілген бөлігі сатып алынды. Оқу жылының басына дейін № 7 балабақшаның сейсмотұрақтылығын күшейту аяқталады. Мұратбаев-Жібек жолы көшелерінің бойына орналасқан балабақшаның бұрынғы ғимаратын жеке меншіктен қайтару және Тілендиев көшесіндегі бұрынғы балабақшаны қалпына келтіру мәселесі қарастырылуда.

Алмалы ауданы денсаулық сақтаудың сапалы жүйесінің орталығы болып табылады, бұл емханаларға тіркелген халықтың санына әсер етті. Мұнда қаланың және облыстың басқа аудандарының тұрғындары тіркелуге ұмтылады, деп атап өтті қала әкімі Ерболат Досаев.

Мысалы, аудан халқының саны 224,5 мың адам болса, ауданның 18 емханасында жақын маңдағы аудандардың тұрғындарын тіркеу есебінен 2 есе көп пациенттерге немесе 443 мың адамға қызмет көрсетіледі.

500 келушіге арналған жаңа емхана құрылысы бойынша ЖСҚ әзірленуде. Сондай-ақ, Райымбек даңғылы бойында психикалық дамуы тежелген балаларға арналған бассейні бар спорт орталығының құрылысына ЖСҚ әзірлеу жоспарлануда.

Алмалы ауданында 45 мәдени-демалыс нысандары мен 53 тарих және мәдениет ескерткіші орналасқан. Ағымдағы жылы Мәуленов көшесінде коворкинг аймағы мен балаларды дамыту орталығы бар жаңа кітапхана ашылып, аудан кітапханаларының жалпы саны 8-ге жетті. Аудан кітапханалары 10 саябақ пен скверлерде балалар мен жасөспірімдерге арналған ойын-сауық бағдарламалары бар «Жарқын жаз» маусымдық жобасын іске асырады. Сонымен қатар, биылғы жылы Райымбек батыр кесенесін қайта жаңарту жоспарлануда.

Алмалы ауданы қаланың «жасыл» аудандарының бірі болып табылады. Аудан аумағында 1 саябақ, 22 сквер, 24 бульвар және жасыл аймақтар бар. Биыл аудан Құрманғазы-Абылай хан-Шевченко-Панфилов көшелерінің қиылысындағы алаңы 3,5 га болатын тағы бір саябақ аумағымен толығады. 2 сквер қайта жөнделуде, «ҚБТУ»-да жұмыстар жүргізілуде, «Әлия мен Мәншүк» скверін абаттандыру осы жылдың күзінде басталады.

Ауданда 2 мың ағаш пен бұта отырғызылды, жыл соңына дейін тағы 10 мыңнан астам көшет отырғызылады. Ауданда 220 мың ағаш пен бұта және көптеген апатты және ескі ағаштар бар. Жасыл қорды жаңарту бағдарламасы аясында биыл 700 апатты ағашты бұзу және өтемдік отырғызу бойынша 7 мың ағаш отырғызу жоспарланған.

Қала әкімінің бастамасымен алғаш рет аулалардағы апатты ағаштарды кесу жүргізіледі. Қала бойынша 5 мың апатты ағаш, оның ішінде Алмалы ауданындағы 800 апатты ағаш мөлшерінде квота белгіленген. Осыған байланысты тұрғындар аудандық әкімдіктерге өтініш бере алады.

«Халықтың бюджетке қатысуы» жобасы аясында Алмалы ауданы бойынша 800 млн теңге бөлінді. Тұрғындар тарапынан 153 жоба ұсынылды. Дауыс беру және қарау қорытындылары бойынша 2022 жылы іске асыру үшін 39 жоба іріктелді.

Алматы әкімімен кездесу барысында тұрғындар жолдарды, кәріз және электр желілерін жөндеу, абаттандыру және т.б. мәселелерді көтерді.

Мемлекет басшысы Қасым-Жомарт Тоқаевтың Жарлығымен бекітілген халықпен кездесулердің жаңа форматына сәйкес жыл соңына дейін Ерболат Досаев Халықпен 24 кездесу өткізеді – тоқсан сайын 8 ауданның тұрғындарымен бір-бір кездесу.

Еске салсақ, Алматы әкімінің халықпен алғашқы кездесуі Бостандық ауданында 14 сәуірде, екіншісі – Алатау ауданының тұрғындарымен 28 сәуірде, үшіншісі – Әуезов ауданында 12 мамырда, төртіншісі – Наурызбай ауданында 19 мамырда, бесіншісі – Жетісу ауданында 26 мамырда, алтыншысы – Медеу ауданында 17 маусымда өтті.