Алматыда әл-Фараби даңғылы маңында жаңа демалыс кеңістігі ашылды

Алматыдағы әл-Фараби даңғылының үстінде, Тұңғыш Президент саябағының іргесінде бірнеше айдан бері жаңа демалыс орны — Flow Park жұмыс істеп тұр. Осы уақыт ішінде ол балалы аналардың ғана емес, қаланың қарбалас тіршілігінен бір сәтке тынығып, демалғысы келетін жандардың да сүйікті мекеніне айналып үлгерді, деп хабарлайды Almaty.tv.

Мұнда келушілердің сан алуан түрін кездестіруге болады: балаларын арбаға отырғызып серуендеп жүрген аналар, асықпай қыдырғанды ұнататындар және белсенді демалысты қалайтындар. Ал экстремалды спорт әуесқойлары үшін скейтборд, велосипед және самокат тебуге арналған бірнеше арнайы алаң қарастырылған. Мұнда олар шеберліктерін шыңдап, күрделі трюктерді орындауға мүмкіндік алады.

Тыныштықты қалайтындар үшін де қолайлы жағдай жасалған. Саябақта орындықтар қойылған жайлы жағалау бар. Бұл — сәл тынығып, айналадағы әсем көріністерді тамашалауға немесе су маңында уақыт өткізуге таптырмас орын. Ал жүгіруді ұнататындарға жаттығуды жайлы әрі қауіпсіз етуге арналған арнайы жабын төселген.

Кішкентай келушілерді қуантатын ерекше орындардың бірі — мұндағы көптеген әткеншек. Олардың көптігі соншалық, балаларға кезек күтіп, орынға таласудың қажеті де бола қоймас. Әр бала өзіне ұнайтын ермек таба алады.

Осылайша, Алматы картасында туристер ғана емес, қала тұрғындарының өздері де назар аударуға тұрарлық тағы бір орын пайда болды. Енді жаңа әрі жайлы демалыс орнын табу үшін алысқа барудың қажеті жоқ.

Оқи отырыңыз: Алматыда заңсыз салынған «Жетісу-Семиречье» базарын бұзу жұмыстары басталды