Алматының Бас жоспары қаланы желдетуді жақсартуды көздейтін іс-шараларды қамтыды

Өңірлік коммуникациялар қызметінің алаңында «Алматыбасжоспар» ғылыми-зерттеу институтының бас директоры Асхат Сәдуов осылай деді. Қаладағы ауаны жақсарту үшін Бас жоспарда қандай іс-шаралар қарастырылғаны туралы сұраққа жауап бере отырып, ол тау аймағында қалыптасатын және қаланың микроклиматына әсер ететін желдің өтіне кешенді зерттеулер жүргізілгенін атап өтті, деп хабарлайды Аlmaty.tv.

«Дерекке қарағанда, жел көбіне солтүстік–солтүстік-шығыс, оңтүстік-батыс және оңтүстіктен соғады. Әсіресе қыс кезінде бұл бағыттан желдің соғуы үдей түседі. Осы анықталған заңдылықтарды ескеріп, Бас жоспарда қалалық ортаның табиғи желдетілу деңгейін арттыруға бағытталған қаладағы құрылысқа қатысты біраз шешім қолға алынғалы отыр», - дейді спикер.

Олардың қатарында:

• Қаланың табиғи желдетілуін күшейту үшін көше-жол желісі мен қаладағы үйлерді желдің негізгі бағытына ыңғайлап құру;
• Қаланың жоғарғы және орталық бөліктерінде қалыптасатын ауа ағындарының негізгі жоғары-төмен қозғалысын қамтамасыз ететін аймақтарда ретсіз биік құрылысқа шектеу қою;
• Зиянды қоспалардың таралу жылдамдығын айтарлықтай төмендететін шамадан тыс тығыз құрылысты азайту;
• Қалалық кеңістіктердің еркін желдетіліп, ауа массаларының еркін өтуіне мүмкіндік беретін ғимараттардың кеңістіктік-көлемдік құрылымын қалыптастыру;
• Табиғи желдің ағынын көшелер мен кварталдарға бағыттайтын сәулеттік шешімдер әзірлеу.

Аталған іс-шараларды іске асыру қаланың табиғи желдетілуін айтарлықтай жақсартып, ауаның сапасын арттырып, тұрғындарға қолайлы орта қалыптастыруға мүмкіндік береді.

Оқи отырыңыз: Бас жоспарды жаңартқан соң Алматыда құрылысты бақылау күшейді