Биыл 380 мыңнан астам жас алматылық комьюнити орталықтарға барды

2025 жылдың басынан бері Алматыда тұратын 380 мыңнан астам жас комьюнити орталықтардың қызметін пайдаланды. Бұл 14 пен 35 жас аралығындағы жастарға арналған заманауи кеңістіктер, мұнда олар білім алып, жұмысқа орналасып, әлеуметтік және психологиялық қолдау ала алады. Бұл туралы Алматы қаласы Жастар саясаты басқармасынан мәлімдеді, деп хабарлайды Almaty.tv.

Осы кезеңде орталықтарда 1,6 мыңнан астам іс-шара өткізілді. Жастар қала өмірінің мәдени, білім беру, экологиялық және еріктілік бағыттарына белсенді қатысып келеді. Әр ауданда жергілікті жастардың қызығушылығы мен көзқарасын көрсететін жеке комьюнити құрылып келеді. NEET санатындағы (оқымайтын және жұмыс істемейтін) жастарға ерекше көңіл бөлінген.

Мәселен, биыл 6,2 мыңнан астам адамға еңбекке орналасу жөнінде кеңес беріліп, 3,9 мыңнан астам жас тұрақты жұмысқа тұрды. Сондай-ақ, 1 мыңға жуық жасқа психологиялық, ал 1,3 мыңнан астам өтініш бойынша заңгерлік көмек көрсетілді.

Комьюнити орталықтардың жұмысы жүйелі түрде ұйымдастырылған: жастардың әлеуеті бағаланып, жеке даму бағыты айқындалады, оқу мен тәлімгерлік бағдарламаларға және әрі қарай жұмысқа орналасуға мүмкіндік беріледі. Әр орталық өз ауданының ерекшелігі мен жастардың сұранысына сай жобаларды жүзеге асырады.

Қалалық жастар саясаты басқармасының мәліметінше, жыл соңына дейін әр ауданда екіден орталық ашылып, олардың жалпы саны артады.

Бүгінде Алматыда қала әкімдігінің жобалық кеңсесінің қолдауымен 11 комьюнити орталық жұмыс істейді. Бұл жай ғана коворкингтер емес, жастардың пікір алмасып, мүмкіндігін дамытып, көмек ала алатын орталық алаңдары. Мұнда психологиялық және заңгерлік кеңес алып, кәсіби бағдардан өтіп, түрлі шебердің дәрісіне, тренинг және зияткерлік ойындарға қатысуға болады.

Оқи отырыңыз: Экологиялық бақылау іске қосылды: Алматыда автокөлікті тексеру күшейтілді