Алматыға әлемнің 7 елінен жетекші неонатологтар келді

АҚШ-тан, Франциядан, Швециядан, Литвадан, Өзбекстаннан, Қырғызстаннан және Польшадан келген неонатологтар қазақстандық әріптестерімен бірге 25 және 26 қыркүйекте Алматыда өтіп жатқан ғылыми-практикалық конференция алаңында кездеседі, деп хабарлайды Almaty.tv.

Ол Қазақстанда алғаш рет өткізіліп отыр және жаңа туған және шала туған балаларға медициналық көмек көрсету сапасын жақсартуға және еліміздегі неонаталдық өлім-жітім көрсеткіштерін одан әрі төмендетуге бағытталған.

Бұл форумда әртүрлі елдердің жетекші мамандары неонатология саласындағы негізгі мәселелерді, соның ішінде алтын сағатта жаңа туған нәрестені алғашқы реанимациялаудағы, шала туған және ауру нәрестелерді қолдау үшін арнайы тамақты қолданудағы үздік тәжірибелерді, респираторлық қолдаудың халықаралық тәсілдерін, жаңа туған нәрестелердің инфекцияларымен күресті, жоғары қатерлі жүктілік кезінде бақылаудың прогрессивті тактикасын және басқа да өзекті тақырыптарды талқылайды.

Конференцияны «Астана медицина университеті» КЕАҚ және AYALA қайырымдылық қорының қолдауымен ҚР Денсаулық сақтау министрлігінің бастамасы бойынша Қазақстан акушер-гинекологтары мен неонатологтарының конгресі ұйымдастырды.

ҚР штаттан тыс бас неонатологы және Қазақстан акушер-гинекологтары мен неонатологтары конгресінің президенті Бектұрған Карин бұл конференцияның өткізілуі бүкіл Орталық Азия өңірінде неонаталдық өлім-жітімді азайтуға елеулі үлес қосып, неонатология мен перинатологиядағы халықаралық және өңірлік көшбасшылармен ынтымақтастықты одан әрі жемісті етуге көмектеседі деп есептейді.

«Қазір Қазақстандағы неонаталдық қызмет перинаталдық орталықтардың, перзентханалардың мыңдаған дәрігерлері мен медбикелерін біріктіреді, олар медициналық көмектің сапасын жақсарту үшін үнемі жұмыс істейді. Сапа бірінші кезекте дәрігерлердің де, орта медициналық қызметкерлердің де біліміне, тәжірибесі мен дағдыларына байланысты. Сондықтан жетекші халықаралық тәжірибешілердің қатысуымен конференциялар өткізу – елдегі неонатологияны дамыту үшін өте маңызды. Біз білім беру бастамаларымызды көптеген жылдары бойы қолдағаны үшін AYALA қайырымдылық қорына ризашылығымызды білдіреміз», - деп атап өтті Бектұрған Қарин.

UNICEF пен ДДҰ деректері бойынша Қазақстан тәуелсіздігінің алғашқы жылдарында әрбір мың нәрестенің 23-і бір айға да жетпей қайтыс болды. Қазір жағдай бірнеше есе жақсарды – 2022 жылдың соңында нәресте өлімі 5 промилледен төмен болды. Бұл Еуропалық одақ елдеріне өте жақын және Орталық Азия елдері арасындағы ең жақсы көрсеткіш. AYALA қайырымдылық қорының негізін қалаушы және президенті Айдан Сүлейменова дәл осы үздік халықаралық сарапшылардың озық практикалық білімдерімен алмасу Қазақстанға неонаталдық өлім-жітім көрсеткішін айтарлықтай төмендетуге қол жеткізуге көмектескеніне сенімді.

«AYALA қайырымдылық қоры 14 жылдан бері тегін шеберлік сыныптарын, семинарларды ұйымдастырып келеді, қазақстандық неонатологтардың, медбикелердің, акушерлердің кәсіби құзыреттерін дамытуға көмектесу үшін конференцияларды қолдайды. «AYALA академиясы» онлайн-платформасын қазақ тіліндегі кез келген мобильді құрылғыдан қолжетімді тегін бейне курстарымен белсенді түрде дамытудамыз. Бірнеше жылдан бері түрлі елдерден неонатологтар мен неонаталдық медбикелерді біріктіре отырып, онлайн-клубтар өткізуге көмектесеміз. Дәрігерлеріміздің алған білімі мен ең үздік халықаралық тәжірибені күнделікті қолдануы Қазақстандағы неонаталдық медициналық көмек ретінде нағыз серпіліске негіз болды», - деп атап өтті Айдан Сүлейменова.

AstraZeneca, Baxter, MedConceptService, Drager және Acino компаниялары демеушілік еткен конференцияда Paris-Saclay университеттік ауруханалары (Франция), Кливлендтегі Cleveland Clinic Children's and Pediatric Institute (АҚШ), Santaros Klinikos Вильнюс университеті ауруханасы, Sahlgrenska университетінің Сильвия патшайым балалар ауруханасы (Швеция), Познань медицина ғылымдары университеті (Польша), Неонаталдық мәселелер жөніндегі республикалық перинаталдық орталық (Өзбекстан), Ана мен баланы қорғау ұлттық орталығы (Қырғызстан), Алматы қаласының Педиатрия және балалар хирургиясы ғылыми орталығы, Астана медицина университеті, Түркістан, Өскемен, Қарағанды, Қызылорда, Тараз қалаларының облыстық перинаталдық орталықтары және басқа да жетекші қазақстандық медициналық мекемелер сияқты медициналық орталықтардың медицина ғылымдарының 26 кандидаты, профессорлары мен сарапшылары баяндама жасады.

Оқи отырыңыз: Алматыда архив ісіндегі алғашқы хакатон өтті