Жүкті әйел скринингтен қай уақытта өтуі керек: алматылық гинекологтың кеңесі

Алматы №36 қалалық емхана гинекология бөлімшесінің меңгерушісі Райхан Қалиева жүкті әйел скринингтен қай уақытта өту керек екенін айтып берді, деп хабарлайды Almaty.tv.

Жүкті әйел жүктіліктің 10-аптасына дейін емханаға тіркелуі керек.
Тіркеу кезінде ол жалпы қан анализін, жалпы зәр анализін және зәр баксебіндісін қоса алғанда, толық клиникалық және зертханалық тексеруден өтеді. Алғашқы УДЗ кезінде ұрықтың генетикалық ауруын зерттеу үшін биохимиялық қан анализі де жүргізіледі. Қазір тіркеуге арналған диагностикалық зерттеулер тізімінде бүйректің ультрадыбыстық зерттеуі де бар.

"Көрсеткіштер бойынша листериоздың бар-жоғын анықтау үшін анамнезінде түсік не ұрықтың қатып қалуы болған жүкті әйелден қан аламыз. Генетикалық зерттеуді биохимиялық қан анализінің нәтижелерін алғанға дейін бірден жүргізуге болады. Бұл 37 жастан асқан, сондай-ақ анамнезінде генетикалық патологиямен дүниеге келген баласы бар әйелдерге қатысты", - дейді Райхан Қалиева.

Қазір әйелдің қан қысымы мен зәрдегі ақуыздың жоғарылауына әкелетін ықтимал жағдайды анықтау арқылы преэклампсияға да тексереді.

Бірінші УДЗ-скрининг 12-13- аптада, екіншісі - 19-дан 21- аптаға дейін, үшіншісі - 30-аптада өтеді. Алғашқы скрининг кезінде әйел Даун синдромы, Эдвардс синдромы және Тернер синдромы сияқты генетикалық ауруларға тексеріледі. Екінші скрининг, әдетте, ұрық органдарының ақауын анықтайды, солардың ішінде жүрек, асқазан-ішек жолдары және орталық жүйке жүйесінің ақаулары жиі кездеседі. Көбіне бұл ақаулар вирустық инфекциядан, соның ішінде COVID-19-дан кейін пайда болады.

Үшінші скринингте, 30-аптада, ұрықтың өсуі және оның жүктілік мерзіміне сәйкестігі бағаланады. Егер екінші скрининг кезінде даму ақауы анықталса, үшінші скринингте шағын жүрек ақауының жабылуы байқалып, диагноз жойылуы мүмкін. Сондай-ақ осы кезеңде плацентаның орналасуы анықталады: оның жатыр мойнының ішкі қуысынан 45 мм-ден астам қашықтықта орналасуы қалыпты деп саналады. Егер плацента төменірек орналасса, ол төмен орналасқан деп саналады және плацентаның орналасуы ықтимал қауіпті болуы мүмкін.

Жұмыс істейтін жүкті әйел медициналық сақтандыруды төлеуді жалғастырады және декреттік демалыс алады.

Жұмыс істемейтін әйел де тегін медициналық көмек алуға құқылы; ол тізілімге жұмыс істемейді деп енгізілуі керек. Осыдан кейін ол автоматты түрде сақтандыруды алып, тегін бақылана алады.

"Әйел жұмыс істемейтін болса, емханаға барып, тіркеуге алынғаннан кейін үш күн ішінде оған тегін медициналық көмек көрсетіледі", - деп түйіндеді сөзін Райхан Қалиева.

Оқи отырыңыз: Дәрігер қателігінен зардап шеккен науқасқа ақы төленеді