Медеу мұз айдынында биылғы сырғанау маусымы 15 күнге ерте басталмақ

Медеу мұз айдыны биылғы сырғанау маусымын 15 күнге ерте бастап, спортсүйер қауымды қуантпақ. Ертең кешеннің салтанатты ашылуына орай ауқымды концерт ұйымдастырылады. Жаңа маусымда мұндағы спорттық жабдықтар жаңарып, мұздың сапасы жақсарды, деп хабарлайды Аlmaty.tv тілшісі.  

Медеу мұз айдыны жаңа маусымда келушілерді қарсы алуға әзір. Бүгін сырғанау алаңының техникалық ашылуы болды, кешен ертеңгі күнге сақадай сай. Биыл сырғанауға арналған жабдықтар 100% жаңартылып, 3000-нан аса итальялық коньки алыныпты. Сондай-ақ аренаның іші жөндеуден өтті. Қаланың тынысы мен жүрегіне айналған мұз сарайына баруды тұрғындар асыға күткен көрінеді.

"Мен коньки тебуді жақсы көремін. 1974 жылдан бастап келіп жүрмін, 10 жасымда сырғанап үйрендім. Жыл сайын маусымның алғашқы күнінде келіп, сырғанау дәстүрге айналды", - деді қала тұрғыны Ислам Синицов.

"Осы жылдан бастап туристер ағымы ұлғайған себебінен біз барлық жабдықты ауыстырдық, яғни жаңа италиялық жабдық алуға тура келді", - деді жалға беру пунктінің қызметкері Динара Жаңабаева.

Медеу мұз айдынының техникалық ашылуы болды. Жаңа маусымдағы мұздың сапасы өте жақсы. Инжинерлердің сөзінше, 9-10 сантиметрлік жабынды жаңа технологиялармен жасалды. Бұл жерде мұздың неғұрлым ыңғайлы әрі қауіпсіз болуы қамтамасыз етілді.

"Биыл техникалық жағынан үлкен жұмыс атқарылды. Мұздың төменгі қабатындағы жабындыны арнайы бояумен сылап шықтық. Оның үстіне тағы бірнеше қабат мұз төселді. Бұл сырғанағанда тайып кету қаупін азайту үшін жасалады. Біраз техника да жаңарды", - деді "Медеу" спорт кешенінің жетекші инженері Данияр Ибраев.

Ертең Медеу мұз айдынының жаңа маусымы салтанатты түрде ашылады. Сағат 12:00-де басталатын концертте эстрада жұлдыздары мен спортшылардың және танымал диджейдің музыкалық сүйемелдеуімен байқаулар өтеді.

"Бүгін маусымның техникалық ашылуы болды. Келушілер өте көп. Жалпы Медеуге бір күнде ең көбі 5 000-6 000 адамға дейін келеді. Мұз айдыны биыл жаңғыртылды. Ертең салтанатты ашылуды дүркіретіп өткізуге дайындалып жатырмыз", - деді "Медеу" спорт кешенінің қызметкері Олжас Ершеев.

Мұз айдынының әкімшілігі жаңа сырғанау маусымы мерекелік іс-шаралар мен спорттық жарыстарға толы болатынын айтады. Келушілерге ыңғайлы болу үшін билеттерді онлайн сатып алу жағы қарастырылған. Жылдам тамақтану орындары да ұлғайтылды.

Әйкерім Пернебек, Жақсылық Тілепберген, Аlmaty TV

Оқи отырыңыз: Жуырда! «Алматы» арнасынан «Бұлттар көшкенде» телехикаясын көріңіз