Visit Almaty: әуежайда жаңа ақпараттық орталық ашылды

Алматы әуежайында Visit Almaty жаңа ақпараттық орталығы ашылды, деп хабарлайды Almaty.tv.

Алматы халықаралық әуежайының жаңа терминалында Visit Almaty ақпараттық орталығы жұмысын бастады. Бұл – қаладағы әртүрлі жерлерде орналасқан ақпараттық орталықтар желісінің оныншы нүктесі.

Орталық тәулік бойы жұмыс істейді. Халықаралық, сондай-ақ ішкі туристерге ақпараттық және кеңес беру көмегін ұсынады. Күндізгі және түнгі ауысымда жұмыс істейтін білікті кеңесшілер шетелдік туристерге қаладағы бағыт-бағдар бойынша, көрікті жерлерді табуға көмектеседі. Сонымен қатар мәдени іс-шаралар мен туристік маршруттарға қатысты сұрақтарға жауап береді.

Орталықта туристер үшін арнайы аймақ жабдықталған. Бұл аймақта туристер жүк сөмкелерін жоғалтып алған жағдайда немесе басқа да күтпеген жайттар орын алған сәтте, тек көмек алып қана қоймай, мәселесінің шешімін қолайлы жерде күтуге мүмкіндік алады.

Visit Almaty ақпараттық орталықтары туристерге маңызды ақпарат пен қызметтерге қолжетімділікті едәуір жеңілдетіп, туристік инфрақұрылымды дамытуға және қаланың туристер арасындағы тартымдылығын арттыруға ықпал етеді.

Оқи отырыңыз: Алматыда Ауғанстан тауарларының көрмесі ашылды