Алматыда көпқабатты тұрғын үйге заңсыз салынған кезекті қосалқы нысан сүрілді

Алматының Қала құрылысы бақылау басқармасы Ақан Сері көшесі, 18-үй мекенжайында орналасқан нысанның сүрілгені туралы хабарлады, - деп хабарлайды Аlmaty.tv.

Жоспардан тыс жүргізілген тексеру барысында аталған қосалқы нысанның рұқсатсыз салынғаны анықталды.

Нысан иесіне (жеке тұлғаға) қатысты әкімшілік шаралар қабылданып, заңбұзушылықтарды жою туралы нұсқама берілді.

2025 жылы 9 қазанда Әкімшілік құқық бұзушылықтар жөніндегі мамандандырылған ауданаралық соттың қаулысымен нысан иесі кінәлі деп танылып, заңсыз салынған құрылысты мәжбүрлеп бұзу туралы шешім шығарылды.

Қала құрылысын бақылау басқармасының мәліметінше, бірер күн бұрын қосалқы нысанды бұзу жұмыстары сот шешімін орындау мақсатында басталған.